|
Katba nangmih ki sngi ki jingsniew ki nangjyllei ha sawdong ka ri baieid jongngi. Kumta nga kum ka doh ka snam ba mih na u Hynniewtrep hynniew skum nga da iam pangnud marwei hato iano ngin kynnoh bad mano ban shim ka jingbah khlieh haba ka longbriew man briew ka hiar arsut?
Kaba Nyngkong nga kwah ban pashat jingmut sha ki rympei Iing Khasi jongngi ba naduh ki kmie, kmiesan, kmienah, u kpa, pasan pakhynnah ban iarap lem ia ki khunrit Khasi jongngi ban im ha ka akor ka burom da kaba ngi ai ruh ka por ban sneng ban pynkynmaw ia ki khun ki pyrsa kumno ban im tipbriew tip blei bad ruh ban don ka mynsiem sngewlem bad ia ieit markylliang bad ki paramarjan marpa. Lada ngin shu ieh ia ki khun jongngi khlem sneng khlem kraw ka mut ba ngi pynap shrip hi mangi dalade ialade bad kane ka kan wanrah jingeh ynda haba ngi la tymmen bad ngim lah shuh ban trei. Lada ngim hikai ba ki khun jongngi ia ka akor ka burom ban don jingieit jingsngewlem kin ym nang da leilei ban ieit kylla iangi ki kmie ki kpa. Ki kmie ki kpa kim dei tang ban thied mobile ne pynthep internet ia ki khun jong ki hynrei ki dei ruh ban shim ka jingkit khlieh ban tip kumno ba ki khun jong ki ki pyndonkam internet. Namar ban peit ia ki comment jong ki khun samla lung jongngi ha ki internet lah ishyrkhei bad ima shikatdei eh.
Sha ki Nongpyniaid skul, Nga sngewnguh ia ki skul kiba ai jingshai jingstad ia ngi ki rit ki ria bad ngi kiew ngi ioh jingtip ba kordor na ki skul ba ngi pule. Kumta nga kyrpad ia ki skul ba kin shimkhia lem ban iarap ia ki samla rit samla lung jongngi ban bsuh ha ki ia ka akor ka burom nalor ki jingpule ba ki hikai. Hooid mynta kam dei shuh ka por ban shoh ban bom ia ki khynnah skul kum ha ki por mynshwa hynrei lada ki nonghikai ki hikai bad pyni da ka jingieit ki khynnah jongngi ki lah ban kylla. La sngewdei ban ai jingmut ruh ba ki skul ki dei ban don ruh ki counsellor namar ki don shibun ki khynnah skul bapli ba wan na ka longing longsem ba dap da ki kynrum kynram bad ngi dei ban sngewthuh lada ki samla rit jongngi kim sngew don jaka ha iing shano pat kin don jaka lait na ki Skul ba ki pynlut por? Hooid ym baroh kiba wan na ki longing longsem ba paid ba pra tangba ngi lah don kyrhai ki longiing longsem bapli ba iakynduh jingeh ha iing ha sem.
Sha Ki Synod, Parish, Assembly bad kiwei de ki Balang rit bad kumjuh sha ki Niam Tre Niam Khasi. Nga kyntu jur ia ki nongialam niam jongngi naduh ki niam khristan bad ki niam tynrai bad da iaraplem ban hikai ban ia ai mynsiem ban pynlong briew man briew ia ki samla rit jongngi ymtang ha ki iingmane iingseng, jingiaseng heh ne lympung hynrei ruh ban leit shabar na ki saw kynroh leit rung sha ki pata sha ki jaka khalai bad iasyllok lem ia ki khynnah samla jongngi. Leit sha ki kyndong kynshrot sha ka jaka ba ki khynnah samla ki sngewtynnad ban ialum bad ialam ia ki sha ka lynti kaba bha. Nga sngew ba ki Balang Khristan ki ud namar bymlah thung Pastor shuh namar ba ki post kiba bun ki lah daplut. Hynrei lada ngin phai pat sha ka imlang sahlang ngi donkam da ki phew hajar ki pastor ki ban aiti med bad mynsiem ban pyni ia ka lynti kaba dei sha ki samla rit jongngi khang ba kin ym sakma lynti sha ki jingdih buaid bad im tanglang. Sha Ki Balang shnong nga sngewdei ba ki Balang shnong ruh ki dei ban shim ka jingbah khleih haba ki khun Balang jongki ki kiew pule sha sor nga sngewdei ban ai jingmut ba ki Balang shnong ki dei ban pyntip sha ki Balang kiba don ha sor ban leit peit leit jngoh lem ia ki khun samla kiba wan na nongkyndong. Ngi dei ban hikai ruh ban kiar na kaba pyniapher Niam, niam Khristan ne Niam Tynrai hynrei kum ki khasi ngi dei banburom iwei ia iwei.
Sha ki Khun Samla. Nga kwah ban pynkynmaw iaphi lada phi dei ki Khristan ka Bible ka ong Leh kmen ko samla hynrei kynmaw pat ba U Blei un sa bishar iaphi (Ecclesiates 11:9).Lada phi dei ki khun samla ba dang bud ia ka niam tynrai kynmaw ba don ka Akher ka sngi kaba U Blei un sa bishar ia ki kam jongngi baroh babha ne ba sniew. Baroh ngi kwah ban don ka lawei ba phyrnai ban im ban roi ban kiew ha ka ioh ka kot. Ban kiew sha ki kyrdan shaneng kam dei kaba suk lada ngi shu pynlut por tang ha ki mobile ki social media ban ieng ha ki kynroh surok shnong ia dih ia bam. Ka lawei ba phyrnai ka bud ryngkhi ia kaei kaba ngi leh mynnin bad mynta. Ka lawei kaba phyrnai ne kaba dum ka don ha ki kti jongphi. Lada phi don ka jingkitkhlieh ialade kane ka lah dei lupa ka jingkit khlieh ia ka jaidbynriew ruh. Ka jaidbynriew jongngi ka donkam ki samla kiba kut jingmut ban tei ialade shwa, ia ka iing ka sem bad ka jaidbynriew lymda kumta ka jaidbynriew jongngi kan don hapdeng ka jingduh jing kyrmen.
Khublei
Angel Mac Suting
|