Pyniasoh UDP, u MDC shimet

Shillong, 28 K’lyngkot:
U CEM barim ka JHADC u Bah Moonlight Pariat u la pyniasoh sha ka UDP bad la pynlong ia ka jingpdiang burom ia u ha ka jingialang kaba long ha ka sngi Nyngkong ha Jowai.
U Bah Pariat u lah ban iakhun MDC na ka seng UDP ha ka elekshon ban wan.
Ia u Bah Pariat la pdiang sngewbha da u president ka UDP u Dr Donkupar Roy, u working President Bah BM Lanong, u Bah Jemino Mawthoh, Mihsalan Suchiang, Michael Sayoo bad kiwei pat ki nongialam ka party.
U Bah Pariat un iakhun ia kane ka elekshon MDC ban wan na ka UDP na Jowai South constituency pyrshah ia u Bah Dunno Nongpluh na ka Congress.
Kane ka jingwan iasoh u Bah Pariat, kan long ka jingioh nong ia ka UDP ha Jaintia Hills namar ba u dei uwei na ki nongialam ba kham paw. U Bah Pariat u la long u CEM ka JHADC ha ka por ba u dang don ha ka seng Congress hynrei u la shah beh noh namar ka jingpyrshah seng.