Shillong: Ka KHNAM kawei na ki seng riewlum ha kane ka jylla, kaba don tang uwei u MLA, ka la ong ba kan iaid beit shakhmat ban pyniakhun ha ka elekshon MP Lok Sabha kaban wan.
Haba kren mynta ka sngi, u MLA ka KHNAM u Bah Adelbert Nongrum, u la ong ba un nym kyrshan iano iano, hynrei ka party kan sei beit la ujong u kyrtong ha kane ka elekshon.
“Ngin sei kyrtong beit da u bah THS Boney ha kane ka elekshon MP ban wan, ngim lah ban iapein badno badno ruh”, la ong u Bah Adelbert.
U la ong ba ha kine ki 46 tylli ki snem ka ri Khasi bad Jaintia ka la iakynduh ia ki jingeh bad ka KHNAM kan nym iapein shuh.
“Ngim lah ban iapein namar ba ngi la iapein la 46 snem bad ngin iaid beit shakhmar ban iakhun”, la ong u Bah Adelbert.
Kumba long mynta ka KHNAM kaba don MLA marwei kam don sha ka liangsynshar ne ka liangpyrshah ha kaneka ing dorbar kaba don 60 ngut ki MLA.
Ka liangsynshar ka Meghalaya Democratic Alliance (MDA) ka la pynkhreh ban sei kyrtong monlang na ka kynhun ha kane ka MP elekshon bad na ka liang ka UDP kawei na ki paralok ba kham heh ha kane ka sorkar ba ialam ka NPP, ka la dep tyrwa ia ka kyrteng u Dr Jemino Mawthoh ban long u kyrtong monlang.
Ha kane ka sorkar MDA ba ialam ka NPP, la don lang ka UDP, PDF, HSPSP, BJP, NCP bad MLA shimet.