Plie u nongniah Rickshaw ia ka Hospital ha Delhi

Shillong,25K’lyngkot:
La khot sngewbha ia u Myntri Rangbah ka Delhi u Arvind Kejriwal ban plie ia ka New Delhi Municipal Council kaba la pynkiew kyrdan ia ka Palika Maternity Hospital, kaba don ha Lodhi Colony. Hynrei la iohi ba mynta ka sngi ha katei ka jingshah khot sngewbha ia u Myntri Rangbah la wan ban plie pynban ia katei ka Council da uwei na ki raitoi uba dei tang u nongniah Rickshaw ha nongbah Delhi. Ia katei ka council la plie da u Vijay Baba , 60 snem karta uba la shong la sah la kumba 50 snem eiei ha nongbah Delhi.Utei u nongniah rickshaw u la kyndit bada um sngew lah ngeit wat ha lade marwei ba haba u la ioh ia ka jingpyntip na ka ophis jong u Myntri Rangbah ba u hap ban plie ia ka Hospital.
“Ngam pat ju poi pyrkhat wat ha ka jingphohsniew jong nga ruh ba ngan ioh ban plie ia ka hospital ryngkat bad u Myntri Rangbah hajan jong nga, ka dei ka burom ka ba khraw” ong u Baba.
U Kejriwal u la pynbna ia ka kyrteng u Baba kum u nongplie ia ka hospital, dei hadien ba u la shah khot sngewbha ha ka NDMC ban plie ia ka tei ka Hospital kaba dang shah pynkiew kyrdan. Ha u maw buh nam ia ki nongplie ia katei ka Hospital ka la don ruh ka kyrteng jong u Baba uba dei tang u nongkhyndiat Rickshaw , u Kekriwal bad u MP u Ajay Maken. La ong ba u Baba, wat la u dei tang u nongniah Rickshaw, hynrei u dei pat uba la trei shitrhem na ka bynta ka seng AAP ha ka lekshon ba la dep.