Pyndonkam hok ia ka hok thep vote, ong u nongbishar High Court

Shillong, 25 K’lyngkot:
U nongbishar ka Meghalaya high court u PC Pant u la kyntu ia ki paidbah ka jylla ba kin pyndonkam hok ia ka hok thep vote ha ki elekshon khnang ban pynkhlain ia ka synshar paidbah.
Ha ka jingkren jongu ha ka sngi nongthep vote ha ka nongbah mynta ka sngi ha U Soso Tham Auditorium u Justice Pant u la ong ba ka jingiashim bynta ki nongshong shnong ha ka elekshon kan pynkhlain ia ka rukom synshar paidbah ha ka ri.
U Pant u la kdew ia ka jingpyrshang ka Election Commission of India (ECI) ban pynthikna ba baroh ki nongshong shnong kiba la dap 18 snem kin iashim bynta kum ki nongthep vote ka ri. U la ong ba kum ki nongshong shnong ka ri India, dei ban sngewnguh ia ki nongseng ia ka syn shar paidbah bad ban thaw ia ka tnad pyniaid elekshon kaba laitluid.
U Pant u la pynpaw ia ka jingsngew kmen ba ka jylla Meghalaya ka dei ka jylla ba nyngkong ha ka ri ban joop ha ka jingshon dur ia ki nongthep vote baroh.
“Nga sngew kmen ba kane ka jingrakhe kan ai bor shuh shuh ban pynkhlain ia ka synshar paidbah da kaba pynlong ia ka jingialap bad pynshai paidbah ban pynsngewthuh ia ka hok thep vote” la ong u Pant.
Ha kane ka sngi, une u Chief justice u la pyniaid ruh ia ka jingbam kular kum ka sngi thep vote.
U Chief Electoral Officer (CEO) ka kylla u Prashant Naik u la iathuh ba ka jingpyntreikam ia kane ka ialap paidbah ka long ban pynkhih ban ktik ia ki briew ban pynrung ialade kum ki nongthep vote na ka bynta ban wanrah ia ka jingsynshar paidbah kaba khlain.
U Naik u la ong ba ha ka elekshon MLA kaba la dep, ka jylla ka ioh ia ka rekod haduh 88 per cent ka jingwan thep vote ki briew ha kaba ha ka elekshon MP pat ki wan tang 64 per cent kaba palat ia ka rekod ha ka ri. U la ong ba ka ECI ka la buh thong ban wan 70 per cent ki nongthep vote ha ka elekshon ban wan.