Kwah pyntreikam ka JPM ia ka Lokayukta

Shillong,25K’lyngkot:
Ka Jaintia People Movement (JPM) Central Body kala kyntu ia ka sorkar jylla ba ka dei ban pyntrei noh kloi kloi ia ka Lokayukta Bill hapoh ka jylla khnang ba kan wanrah ia ka jingiaryngkat kyrdan hapdeng uba rit ba ria bad kiba heh ne riewspah kiba shong hapoh ka jylla. Katkum ka kyrwoh bala pyllait da u Publicity Secretary ka seng u bah N. Myrlia la ong ba ka Lokayukta Bill kadei tang ma ka kaba lah ban pyniaryngkat kyrdan ia ki nongshong shnong jong ka jylla. La ong ba kane ka ain kan lah ban teh lakam ruh ia ka jingbam sap hapoh ka jylla, khnang ba yn lah ban wanrah ia ka roi ka par bad ka jingiohkam iohjam jong u duk u suk. Ka seng ka la kynnoh ba bun bun sien ki riew heh spah bad nongbamsap ki la knieh ia ka hok jong uba duk bad ym ju don ka aiñ ka ban pynshitom ia ki haduh mynta. Ka seng ka kyntu ia kiwei pat ki sengbhalang bad ki riew paidbah ban iasnohkti lang ban dawa na ka sorkar ban pyntreikam shi syndon ia ka Lokayukta hapoh ka jylla.