Shongshit ka rakhe hok thep vote ha Jowai

Jowai, 25 K’lyngkot:
Ka jingrakhe ia ka sngi thep vote da ka ophis jong u Deputy Commissioner, West Jaintia Hills District, Election Branch, Jowai hynne ka sngi ka la long kaba shongshit. La pynlong ia kane ka jingrakhe halor ka phang kaba la ai kyrteng ka “Vote for a Vibrant Democracy” ha kaba u Bah P.S Dkhar, Deputy Commissioner, West Jaintia Hills District, Jowai, S.S Syiemlieh, ADC, Jowai, D.P Kharsati, ADC, Jowai, F.B Basan,EAC, D.D Syngai EAC, M. Lytan, EAC, Jowai, ki nongshong shnong ba la kham rangbah na Jowai, ki nongmihkhmat na ki Political Party bapher bapher, ki Scout & Guides, ki khynnah skul, ki samla bad ki staff jong ka DC ophis ki sakhi ha kane ka sngi.
U Bah P.S Dkhar, Deputy Commissioner u la ong ba la rakhe ia katei ka sngi ban pynshlur ne ai mynsiem ia ki samla kiba la 18 snem tam ba kin pyndonkam ia ka hok ka jong ki, ban thep vote ne jied ia la u jong u nongmihkhmat bad ka long ruh kum shi bynta ban pynkynmaw ia baroh ki nongshong shnong ia ka jingdonkam ban iashim bynta ban thep ia ka vote.
U la dap da ka jngkmen haba la iohi ba haduh kumba 85 percent ki la iashim bynta ban thep vote ha ka election kaba ladep bad la khmih lynti ba ha ka election MDC ba kan poi sha ka 90 pecent tam.
Ban pyniphuh iphieng ia ka jingrakhe ki bor pyniaid District ki la pynlong ia ka jingiakop thoh Essay na ka bynta ki samla ba la pule ia ka Degree, ha ka kyrdan Secondary bad Upper Primary ryngkat ki phang ne topics halor ka enrollment ne ka jingthep kyrteng bad ban thep vote kaba long u paia jong ka ri synshar paidbah.
Ka bynta bad ka kamram jong ki nongshong shnong jong ka Ri India haba iadei bad ka rukom synshar paidbah, ka jingdonkam ban thep kyrteng jong ki samla bad ki sur na ka bynta ka lashai, ka hok ban thep vote bad ban ioh ia u nongialam ba shisha.
La pynlong ruh ia ka jingiakop dro na ka bynta kiba ha ka kyrdan Secondary bad Upper Primary, ha kaba ki nongjop ki la ioh ia ki khusnam pisa ryngkat ki syrnod. La pynkut ia ka jingrakhe da ka jingiakop Quiz ne jingkyntip halor ki kam jong ka Election bad ki nongjop ki la ioh ia ka khusnam pisa.