Shillong: Ka Shillong Lajong ka kyrmen ban leh biang kumba ju leh pyrshah ia ka East Bengal ha ka jingiakhun ka lumpung i-league ka ban long mynta ka nohsngi ha JN Stadium, Polo por 2pm.
Kumba ju long ha ki jingialehkai ba la dep, ka East Bengal kam ju lah ban pynkhiem I ka Lajong ha ka jingiakhun hangne ha jaka ka Lajong bad bunsien ka jingialehkai ka kut da ka jingjop ka Lajong lane ha ka jingiakhaid.
Ha ka jingialehkai kaba lah dep jong kane ka aiom i-league 2018-19, ka East Bengal kala pynliem ia ka NEROCA kaba na Manipur da 2-0, katba ka Lajong kala pynliem ia ka Aizawl da 2-1.
Na ka bynta ka jingialehkai lashai, u coach ka Lajong u Bah Alison Kharsyntiew ula pynpaw ia ka jingkyrmen ba ka Lajong kan leh kumjuh kumba ka ju leh ha ki jingialehkai ba la dep, kata ban nym ailad ia ka East Bengal ba kan ioh point nangne na madan.
Ka Lajong ka dei tang ma ka, ha kane ka i-league kaba khlem iasoi nongialehkai bar ri ha kane ka kynti bad kala sei da ki nongialehkai baroh na kane ka dong Mihngi.
Ha kane ka jingialehkai kaba lah dep, ki don 14 hajar ngut kiba wan peitkai bad na ka liang, u coach ka Lajong ula kyrpad ban iawan ban ai jingkyrshan ai mynsiem ban ioh biang ia ka jingjop.
Katba u coach ka East Bengal u Alejandro Menendez ula pynpaw ba ka Lajong ka dei kaba satar bha ha ka jingialehkai hynrei ka East kan iakhun ban ioh khur point beit lashai.
Ula ong ba ka East Bengal kala pynkhreh bha baroh ki nongialehkai ban iamih madan lashai.
Na ka bynta ka jingialehkai lashai, lah ban ioh ia ka tiket na Mobile Centre Khyndai Lad bad na SSA Counter ha Polo.