Ka MDP ka dang neh, ong u Vice President

Shillong, 23 K’Lyngkot:
Ka mih khubor ba ka Meghalaya Democratic party (MDP) ka la khylliap lama ha kane ka jylla ka long kaba bakla.
Ka jingialang jong ka State Executive Committee (SEC) ka MDP kaba long hynne ka sngi Palei, ka la ong ba ka party ka dang im bad kan nang khlain ha ki sngi ban wan. “Ka Party kam shym la khylliap lama ne iasoh bad kano kano ka party”, la ong u khubor na u Vice President Bah SB Nongdhar.
U vice President ka party u la ong ba ka party ka shu kyntu ia u President Bah Martle N Mukhim ba un ialeh elekshon na kano kano ka party riewlum katkum ka jingangnud jong ki nongkyrshan ka party.
Lah ban kdew ba u President ka party u Bah Martle N Mukhim u la rai ban ialeh elekshon MDC na ka party HSPDP na Mawkynrew constituency. Ia u Bah Martle la pdiang da ka party ha ka jingialang kaba long shen ha Jongksha, kaba don ha thain Mawkynrew.
Ka MDP ka dei ka party kaba pait na ka UDP ha u snem ba la dep, hapoh ka jingialam jong u Bah BB Lyngddoh bam kwai ha duwar u Blei, lem bad u Bah Mukhim bad kiwei pat na ka bamsap Meghalaya House ha Kolkata.
Lah sngewthuh ba ka party MDP ka lah ban pynieng kyrtong ha kane ka elekshon MDC ban wan ha kiba bun ki konstitwensi lada ioh ki briew kiba biang.