Lada ngam ioh tiket, ngam ialeh MP shuh :Vincent Pala

Shillong, 22 lyngkot:
Ha shwa ba kan mih paidbah, ka kyrteng jong u kandidet Congress na Shillong Lok Sabbha Constituency, hynrei mynta ka sngi, U Ma Vincent Pala, MP ba dang bat haduh mynta ia katei ka kam, ula kren shai, ba un nym ialeh satia ia ka elekshon MP, lada jia ba um ioh tiket.
Haba iakren da ka mobile bad U Rupang, U Ma Vincent, ula ong “Lada ngam ioh tiket, ngam ialeh shuh”. Katei ka long ka jubab, kaba lyngkot na U MP jong ka Shillong Constituency, ha shwa ba kan dkut noh ka jingiakren bad utei u rangbah.
U Ma Vincent, u bym ju kham ia kynduh satia bad ki nongthoh khubor mynta la bun bun bnai, ula iakynduh mynta ka sngi bad ula kren ruh ha ki kotkhubor ia katei hi kajuh ka ktien, ha kaba ula pynthikna ba un nym iakhun MP, lada um ioh tiket.
Ki lad khubor, ki iathuh ba ka lad kaba kham bha, ha kane ka kynti, la sngewthuh, kumba ka tiket, kan leit sha U Bah John Kharshiing, uba dei U Co Chairman jong ka State Planning Board bad uba don ka jingiadei kaba jan bad u myntri rangbah, U Mukul Sangma.