Yn pynsahnam ki paidbah ka Lyngkyrdem, ia Bah Bring Lyngdoh

Shillong, 22 K’lyngkot:
Ban pynneh pynsah ia ka kyrteng bad ka nam jong u nongialeh ban ioh ia ka jylla uba la long ruh u Myntri Rangbah ka jylla Meghalaya la bunsien, Bah BB Lyngdoh (Bam Kwai ha Duwar u Blei), ba ju khot ieid kum Bah Bring, ki paidbah ba ieid ba thoin na ka thain Lyngkyrdem-Pynursla ki la thaw ia ka ‘BB Lyngdoh Memorial Committee’ ban pynurlong ia ka jingthmu. Ia kane ka komiti la thaw ha ka jingiakynduh jong kiba ieid ba thoin jong katei ka thain ha kane ka sngi Balang ha Pynrusla.

Ban pyniaid ia kane ka kam shakhmat, ka jingialang ka la jied u Bah Tharon Khongstid kum u chairman bad u convenor-cum-secretary ia u Babu Kular Khongjirem.
Ha kane ka jingialang kaba la wan poi da ki briew na ki shnong bapher bapher jong ka thain Lyngkyrdem-Pynrusla, ki la iakren ia ki kam ba une u rangbah jong ka jaitbynriew uba dei u nongthaw na katei ka thain la 25 snem.

Ki riew rangbah ki la bynshet ha kane ka komiti ba kan ialam ban pyniaid ia ki kam ha kaba iadei bad kane ka jingthmu, kum ban iakynduh bad ki bor sorkar, ban ai burom kyrpang ia une u rangbah.
Lah ban kdew ba ka sorkar ka la ai burom ia u Myntri Rangbah barim u Capt WA Sangma katba ia u Bah BB Lyngdoh uwei napdeng ki rang kynsai jong ka jylla, ym pat ioh ka jingai burom na ka sorkar kum ka jingpynsah nam ia u da kano kano ka kyrteng ne ka kam.

“Ngi leit ban iakynduh ia bor sorkar ban ai jingthoh ban ai burom kyrpang ia une u rang kynsai (BB Lyngdoh) uba mih na ka thain jong ngi”, u la ong u Babu Khongjirem.
U Babu Khongjirem u la ong ba kane ka komiti kan thaw ia ki lad ki lynti ban pynsahnam ia une u rangbah da kaba pynieng Maw Dur ha ka shnong jongu ha Laitlyngkot ne ha ka jaka ban sa iakren ban iapynbeit bad ban leh kiwei de ki kam ban pynah ia ka kyrteng jongu.

Lah ban kdew ba u Bah BB Lyngdoh u dei u nongialehkai ban pynioh ia ka jylla Meghalaya ryngkat bad jong u Capt WA Sangma, bad kiwei ki riew pawkhmat ka jylla. U Bah Bring ba ju khot ieid, u la long u Myntri Rangbah ka jylla Meghalaya la bunsien bad u dei u nongialam bym ju phet sha ki seng national party haduh ka sngi ka jingiap jongu. U la khlad noh ha ka 27 tarik Risaw, 2003 bad ka long 10 snem.