Wat tieng ia ki seng lehnoh mih paidbah ha ka RD: Mukul

Shillong, 22 K’lyngkot:
U Myntri Rangbah ka jylla u Mukul Sangma u la kyntu ia ki paidbah ba kim dei ban tieng ia kane ka pakhang shnong ba la khot da ki kynhun ka seng lehnoh ha ka jylla.
Ka seng Hynniew trep National Liberation Council (HNLC) ka la khot pakhang shnong ba 17 kynta naduh ka por 1 mynstep haduh 6 baje janmiet ha ka 26 tarik mynta u bnai kaba dei ka sngi rakhe ia ka Republic Day.
Ha ka jingialang ba la long mynta ka sngi, u Mukul u la ong ia ki paidbah ka jylla ba kin ia mih paidbah ban iashim bynta ha kane ka jingrakhe ia ka Republic Day.
Nalor ka HNLC kiwei pat ki seng lehnoh bapher bapher jong kane ka thain ki la khot ia ka pakhang shnong kiba kynthup ka seng United Liberation Front of Asom-(Independent) ha Assam, National Liberation Front of Tripura (NLFT) ha Tripura, National Democratic Front of Boroland (Songbijit faction) ha Assam, Kamatapur Liberation Organization (KLO) Assam bad ka North Bengal bad hynriew tylli ki seng ha Manipur hapoh ka lama jong ka Coordination Committee (CorCom).
U Mukul haba kren hynne ka sngi hadien ba la wai ka jingialang cabinet hynne ka sngi Balang u la ong ba ki paidbah kim dei ban tiang ha katei ka sngi ba la khot pakhang da kitei ki khynhun seng lehnoh hynrei ki dei ban iamih paidbah ban iashim bynta ban rakhe ia katei ka sngi.
U Mukul u la ong ba ha katei ka sngi na ka liang jong ka sorkar ka la pynbiang ia ki bor pahara khnang ba kane ka sngi ba ki rakhe ia ka Republic Day kan long kaba iaid beit iaid ryntih .
La pynbiang ia ki bor pahara ha baroh ki Nongbah jong ki District katba ha ka Nongbah la pynlong ia ka jingpeitngor ha baroh ki nongbah.
La ong ban khanglad ia ki seng lehnoh ban wan rung na Bangladesh sha kane thain North east la pynieng ap pahara da ki Border Security Force (BSF).
Ha katei ka sngi ban rakhe ia ka Republic Day u Lat un pyher lama ha Nongbah Shillong, katba ha Tura un pynher lama da u Sniawbhalang Dhar, ka Myntri kam pohiing ka Kong Roshan Warjri kan pynher lama sha Sohra katba u Myntri Rangbah barim u Bah DD Lapang un pyher lama ha Mairang.