Shillong: U Myntri Rangbah ka jylla u Conrad K Sangma uba long ruh u president ka Meghalaya Cricket Association (MCA), u la ong ba ka sorkar Meghalaya ka don ka jingthmu ban pynbiang ia ki madan ialehkai bad ki jingdonkam na ka bynta ban ioh pdiang wat ia ki jingialehkai kriket baduh ha ka ri, kum ka Indian Premiere League (IPL) ruh ha kane ka nongbah.
Haba kren mynta ka sngi ha ka jingplie ia u mawnongrim ban shna ia ka jaka kilanmet bad jaka praktis ia ki nongialehkai kriket ha Polo, Shillong, u Conrad, “Ym tang ba ngi ioh ban ialehkai ha ka lumpung Ranji Trophy, Hazare Trophy hynrei ngi don ka jingthmu ban pynkhreh wat ban pdiang ia ki jingialehkai ka IPL ruh”.
U Conrad u la plie ia u mawnongrim ban shna ia kane ka jaka kilan bad jaka praktis ba la bei pisa da ka Board of Control for Cricket in India (BCCI) kaban shong dor T.5.53 klur ban shna ha syndah madan kriket ha Polo.