“Ngam kular” kandidet HSPDP Mawlai

Shillong, 20 K’lyngkot:
Katba kiwei kular ban leh ia kane ia katai, hynrei ha u kyrtong ka HSPDP Mawlai kam long kumta, kaba donkam ka dei ka jingshakri hok ia ki paidbah.
“Ngam kular aikam aijam, lynti iaid kjat, ki surok, pynioh um bad kino kino ki jingkular ki bym lah ban ai, hynrei ngan ieng beit ha ka nongrim ban long u nongmihkhmat ha ka District Council ban shakri hok ia ki Ri bad ka Jaitbynriew”, la ong u Bah Panborlang Ryntathiang u kyrtong ka HSPDP na Mawlai ha ka jingialang ba la long ha sngi Thohdieng.
U Bah Ryntathiang u la ong u iohi ba bun ki seng sain pyrthei kim long kiba khuid kiba suba bad kiba beit ka lynti bad kane ka la pynlong ia u ban kyntait ban iasoh hynrei dei tang ka HSPDP lyngba u Bah Ardent Basaiamoit, MLA ka Nongkrem kaba pyni ia ka jinglong khuid suba bad ka jingdon jong u Presisdent ka seng u bym pat don dak thoh bira tad haduh mynta u Bah Hopingstone Lyngdoh. Kine ki nongialam ki la ktik ia u Bah Ryntathiang ban pyniasoh ialade sha kane ka seng.
U la ong ba ka daw ba pynlong ia ban mih madan ha kane ka elekshon MDC ka long ba u kwah ban shakri ia ka ri bad ka jaitbynriew lyngba jong kane ka seng HSPDP kaba dang khuid.