Ioh PHC ka Mawsiatkhnam

Shillong, 20 K’lyngkot:
U Bah AL Hek, Myntri ka koit ka khiah ka Sorkar Jylla u la plie paidbah ia ka Mawsiat khnam PHC ha ryngkat ka jingsakhi lang jong u Bah Embhahlang B. Syiemlieh, MLA/MDC ka Mawlai Constituency, u Dr. A. Dkhar, DHS, Dr. R. M Lamare, DM&HO, East Khasi Hills, DHS (MI), u Bah J. Majaw, Rangbah Shnong Mawsiatkhnam, Bah Gervasis Kharmujai, ki Rangbah Shnong na ki shnong kiba marjan, ki dkhot ka KSU Mawlai Circle, ki paidbah nongshong shnong bad kiwei kiwei.
Ia kane ka PHC la buh mawnongrim ha u snem 2002, la shim por haduh khat ar snem ban plie ia kane ka PHC namar bym pat don um. Kane ka jingbym lah ban plie ia kane ka PHC ha kine ki 12 snem baladep ka la buh jingeh ia ki paidbah kiba don ha kane ka shnong bad ki shnong kiba marjan ban shem jingeh bad wat na ka liang ka Khasi Students Union (KSU) Mawlai Circle ka la pyndonkam da ka RTI ban wad jingtip halor ka jingbym lah ban plie ia kane ka PHC kaba la sop da ki nuit ha ki snem bala dep.
U Bah Hek shwa ban plie ia kane ka PHC, u ba ka kamram jong ki nongmihkhmat ka long ban phaikhmat sha ki paidbah kiba donkam ia ka roi ka par. U la kular ruh ha kane ka sngi ba ia ki kam kiba lait ha kane ka PHC yn sa ai shwa sha ki trai shnong kiba la biang ha ka kyrdan jingnang jingstad.
Ha kane ka sngi la ioh jingkren ruh na u Dr. A. Dkhar, DHS, Dr. S.S Dohling iba la ai ia ki symboh ban pashat sha ki paidbah halor ka jingmyntoi na ka koit ka khiah kiba ka Sorkar Pdeng ka lah ban ai sha ki paidbah ha ki shnong bapher bapher.
Lyngba kane ka PHC ki shnong ki ban ioh jingmyntoi kin long ka Nongkohlew, Umphrew, Umrynjah, Nongkya, Madan Mawkhar, Umden, Lum shyiap, Wahmyntait, Umjalynshir bad Umlyngkut.