|
Shillong: Ka Malki ka la shah rem noh ha ka Rangdajied United ha ka jingiakhun kaba iakhaid bha ha kane ka sngi Saitjain ha ka jingiaknieh rung ha ka Shillong Premier League kaba long ha JN Stadium ha Shillong. Ka Rangdajied United ka la pynliem ia ka Malki da 2-1 kol. Ha ka jingiakhun ka kyllastep, kim shym la lah ban iathep kol watla ka Malki ka la pyni bor bha ia ka Rangdajied ha kane ka jingiakhun kaba kham satar bha. Dei ha ka kyllamiet ba ka Rangdajied ka la ioh ban pynkhih jar ha ka 65 minit da u Chanmetre Thma ba la pynbuh da u Samson Nongrum. Hynrei ka Malki kam shym la pyndem satia ha kaba u Joseph Seun u la ioh ban thep haka 78 minit ban pyniakhaid syndon 1-1 kol. Hynrei u la hap ban mih noh shabar madan nabar ba u la ioh ar sien ka kot stem bad ka Malki ka la sah sa tang 10 ngut. Dei ha ka jingiakhun lyngba ka jingpynjlan por ba ha ka 21 minit ka Rangdajied ka la ioh biang kawei lyngba u Chanmetre Thma ban rah syndon ia ka jingjop. Da kane ka jingjop, ka Rangdajied ka la rung syndon sha ka lumpung ban iaknieh ia ka phainal. |