Dei ban ithuh ia ki Khasi tynrai, kum ki rit paid, ong U Presideng Seng Khasi

Shillong, 17 K’lyngkot:
U President ka seng khasi, U Bah MF Blah u la ong ba ka seng Khasi ka dawa ba ka sorkar ka dei ban ithuh lem ia ki Khasi kiba dang don ha ka niam tynrai kiba long rit paid.
Ha ka jingiakren mynta ka sngi bad u Rupang, u Bah Blah u la ong ba ka jingdawa jong ki, na ka sorkar ka long ba ka sorkar ka dei ban pynhap ia ka seng Khasi ha ka kyrdan rit paid (minority) kumba ka pynhap ia kiwei ki jaidbynriew ha kane kajuh ka kyrdan khnang ba kin ioh lem ia ki hok kum ki rit paid.
“Ngim bishni ia kiwei hynrei ngi dawa kum ba ioh lem kiwei ki jaidbynriew”, la ong u President ka Seng Khasi.
U la ong ba katkum ka kyndon jong ka Minority Commission ki don ki hok ba la ai da ka sorkar na ka bynta ka jingioh myntoi kum ki rit paid kum ha ka pule puthi bad kiwei ki jingmyntoi ba ka sorkar ka ai khamtam sha kito kiba duna ka jingioh.
U Bah Blah u la ong ba na ka liang jong ka Seng Khasi ka la phah ia kane ka jingthoh sha ka sorkar mynta la san snem eiei, hynrei hynrei haduh mynta kim pat ioh jingthoh eiei na ka sorkar mynta namar ka kam ka dang iaid shait shait halor kane. “Ngi don jingkyrmen namar ba kumba ka long mynta kane ka kam, ka la iaid”, la ong u Bah Blah.
U la ong ba dang shen ki rangbah ka Seng ki la iakynduh ia u Myntri rangbah ka jylla u Mukul Sangma bad ia u MP Bah Vincent Pala ba kin buddien halor kane ka kam.
U la ong ba ka Seng ka pynsngew ha ki, ia ka jingdonkam ban ithuh noh ia kane ki Khasi Tynrai kum ki rit paid namar ba bun ki jingmyntoi kiba ki lah ban ioh katkum ka kyndon jong ka Minority Commission.
“U Tarun Vijay (MP ka BJP) u shu iarap ban buddien ia kane ka kam jong ka Seng Khasi namar ba don ha Delhi ba ngi shem shitom ban leit mih man ka por namar ka jingjngai”, u la ong Bah Blah.
“Ngi burom ia kiwei, ngi ieit ialade”, la ong u rangbah Blah bad kren shai ba ka jingdawa ia ka jinglong rit paid (minority) kam dei ba shun ne bishni iano iano hynrei haba kiwei ki ioh lem ngi ruh dei hok ban ioh”.
Lah ban kdew ba u Tarun Vijay u la phah jingthoh sha ka National Commission ka ri India ba ki Khasi ba don ha Niam Tynrai, ki la shah pynduh ia ka hok kumki rit paid katba kiwei kiba heh paid, ki ioh ia ka jingmyntoi. U Tarun u la ong ba ka sorkar ka dei ban ai ia ka jingithuh noh ia ki Khasi Tynrai kum ki rit paid ha kane ka jylla khnang ba kin ioh ia ki myntoi kumba la ai da ka sorkar.