Kular maramot surok NH 44

Shillong,17 lyngkot:
Ki saw seng mynta ka sngi ki la ia kynduh ia u Executive Engineer ka tnad PWD Road u Bah KB Mawkdoh bad ia u Deputy Commissioner ka East Jaintia hills u Bah WR Lyngdoh ban ia kren halor ka surok NH-44 kaba ka ki tei ki saw tylli ki seng ba kynthup ia ka AJYWO Sengkmie, KSU-Jaintia Hills District Unit, FKJGP-Khliehriat Circle bad ka HNYF-East Jaintia Zone na ka por sha ka por ki la dawa na ka sorkar ba ka dei ban maramot noh ia ka surok NH-44.
Ha katei ka jingiakynduh bad ki saw seng na ka liang ka tnad sorkar kata u DC bad u EE ki la kular ba kin maramot noh ia katei ka surok kaba la sniew palat kaba ki la ong ba yn dang noh ia katei ka kam naduh ka 20 tarik u kyllangkot.  Kumta halor katei ka jingkular jong ka sorkar, ki nongialam jong ka AJYWO, KSU, FKJGP bad ka HNYF ki la rai ban pynsangeh noh shwa shipor ia ka jingthmu jong ki ban khot noh da ka jingiakhih ka ba tyngeh ban pynbor ia ka sorkar ban maramot noh ia katei ka surok.
Ha kajuh ka por u Bah MH Dkhar President jong ka AJYWO Sengkmie u la ong, “Ngin sa iapeit la sngi nyngkong la ka sorkar kan bat ne em la ka kular kat kum ba la ia kren ha kane ka jingialang, ngin pynbna syndon noh da ka jingiakhih kaba tyngeh. Bad lada jia ba ngin iakhih, ngin ym kynrandien shuh wat lada ka sorkar kan khot ia kren ia ngi, tad haduh ba kan pyni da ki kam”
“Ngi kyntu ruh ia ki paidbah jong ka Jaintia Hills bad ruh jong kiwei de ki jylla jong ka North East India  ban iasnoh kti lang bad ngi lada jia ba ngin hap ban khot noh da ka jingiakhih ka ba tyngeh lada jia ba ka sorkar kam bat la ka kular kat kum ba la kular ia ngi ha kane ka sngi ban maramot noh mardor ia katei ka surok NH 44.” la ong shuh shuh u Bah MH Dkhar.