U kyrtong Congress na Jirang

Shillong, 17 K’Lyngkot:
Ka Jirang Block Congress Committee (JBCC) da kawei ka sur ka la phah ia ka kyrteng jong u Bah Albertos Lapang ban long kum u kyrtong jong ka party ha kane ka elekshon MDC na Jirang constituency.
Ia kane ka rai la shim ha ka jingialang jong ka party kaba long ha ka 16 tarik Kyllalyngkot ha Nongpoh. Ka jingialang jong ka Ri-Bhoi District Congress Committee (RBDCC) ka la pdiang ia ka kyrteng jong u Bah Lapang ha ka jingialang ba la pyniaid da u working president ka JBCC u Bah Snomick Kalwing ba long ha Harli Bagan Durbar Hall ha Nongpoh.
Ka thymmei khubor ka iathuh ba ia kane ka kyrteng jong u Bah Lapang ban long kum u kyrtong la leh da kaba shu iathep vote hapdeng ki para dkhot ha kaba kiba bun ki la pynnoh sha u Bah Lapang.
Ia ka kyrteng u Bah Lapang la phah sha ka Ri-Bhoi District Congress Committee kaban shim pat ia ka rai ban phah sha ka MPCC ban leh ia kaba donkam.