Shillong: Ka Langsning Football Club ka la pynliem ia ka Shillong Lajong Football Club ha ka jingiakhun semi phainal ba nyngkong jong ka Shillong Premier League kaba long myn hynnin ka sngi ha madan Polo.
Ka Langsning ka la pynliem ia ka Shillong Lajong FC da 3-0.
U rang ialehkai ka Langsning u Kitboklang Pale u la thep ia ka kol ba nyngkong ha ka 32 minit bud sa u Ebormi Buam ha ka 39 minit jong ka kyllastep.
Ka Lajong ka la shem jingeh ban pynphai kylla ha kane ka jingialehkai ia kaei kaba ka la shah thep katba ka Langsning ka la ioh bun ki lad bad ka kol kaba lai kala wan jia ha ka 76 minit lyngba u Kynsai Lhuid.
Da kane ka jingjop, ka Langsning ka la rung sha ka phainal jong kane ka lumpung bad ka Shillong Lajong kan dang hap ban iakhun pyrshah ia kano kano kaba jop hapdeng ka Rangdajied United bad ka Malki kaban long ha ka 24 tarik.
Ha ka jingiakhun jong kawei ka lumpung pat, ka Lamlynti ka la pynliem da 4- 3 ia ka Risa Colony. Ia ka Lamlynti la thep da u K Shabong ha ka 23, 54, 55), u T Kurbah (62) katba ia ka Risa Colony la thep da u G Kamei (5), P Warlarpih (56), bad u R War (70).
Ka Umphyrnai ka la pynliem ia ka Umpling da 4-0 kol. Ia kine ki kol la thep da u H Kharsyiemiong (25), A Kharkongor (58), B Warlarpih(66) bad u S Tariang (70).