Ki arngut shi tnga, kiba la kwah khun palat, ki la sei tuh ia i khyllung na kpoh jong kawei ka thei armet, da kaba puid ia ka kpoh jongka bad shim noh ia itei i khyllung. La iathuh ba la teh ia katei ka thei armet ha u dieng bad hadien kata ki sa puid ia ka kpoh bad shim ia itei i khyllung.
Ka Mara Cristiana da Silva, 23, kaba dang ar met bad kaba la shah pyniap.
La lap ia ka met iap jong katei ka thei armet, kaba la don phra bnai kynthih, kaba kyrteng ka Mara Cristiana da Silva, 23, ha kawei ka rud nong hajan Joao Pinheiro, sha thie jong ka Brazil.
Katei ka briew, kaba donkti ha katei ka jingtuh khyllung, ka dei ka Angelina Rodrigues, kaba la ju angud ba kan sa ioh khun kynthei.
La iathuh ba ki doktor ha Sao Lucas hospital, ki la pyntip sha ki pulit ha ka Lah Sngi U Blei, halor katei ka jingjia, haba ka Rodrigues, ka leit shah sumar ialade lem bad itei i khyllung ba dang shu kha bad ba ki lyngngoh ruh ba ka don ha ka met kaba koit ba khiah bad ba kam treh ruh ban shah eksamin ialade.
Hadien ka jinglap ia ka miet jong ka Da Silva, hynni ka sngi na khlaw, la kem noh ia ka Rodrigues lem bad u tnga jongka, U Roberto Gomes da Silva.
Ka Rodrigues, ha ka jingtohkit, ka la phla ba ki la pyndih buaid bhor ia katei ka thei armet bad hadien kata ki sa teh ia ka ha u dieng bad hadien kata ki sa puid ia ka kpoh jongka bad shim noh ia i khyllung na kpoh.
I khyllung kynthei, mynta i don ha ka jingshah sumar ha Sao Lucas hospital ha Patos de Minas, ha kaba la sumar ia ka jingmong na ka bynta jong ka khlieh na ka jing dei tari.