Shillong:Ka FKJGP Upper Shillong Circle ka ai ka jing kyrshan kaba pura ia ka jingthmu bad jing pyrshang jong u Bah Hamletson Dohling, MLA Mylliem Constituency & Minister Urban Affairs ban rah noh ia ka Jhalupara Outpost sha jingkieng Umshyrpi.
Ka FKJGP Upper Shillong Circle ka sngew ba kam don satia kano kano ka jingeh, lada ka sorkar hi ka don ia ka mon ban shimkhia ban pynkynriah noh ia ka Jhalupara Outpost sha jingkieng Umshyrpi namar ba kadei ka jaka ba la shu iehnoh shrah mynta la bun bun snem naduh bala dep ban shna ia ka jingkieng kaba thymmai. Na ka por sha ka por ka Seng ka ju ioh ia ki jingujor ba ki Nonglehkam bym man ki pynlong ia katei ka jaka kum kawei na ka jaka riehtngen ban ia dih ia bam bad ban ialeh ia ki kam sngewbha bad ha kajuh ka por ka buh ruh ia ka jingma ia ki nongiaid nong ieng kiba ju iaid da ka kjat na ka Footpath khamtam eh ia ki khun samla kynthei bad ki Longkmie ruh kumjuh namar ba ki Kali naduh ki Truck bad kiwei de ki kali rit ki ju pynlong jaka ieng ha kitei ki bynta. Kumta ka Seng hi ka sngew ba kane kadei ka por kaba biang eh lyngba ka jing shimkhia jong u Bah Hamletson Dohling, MLA Mylliem Constituency ban rah noh ia ka Jhalupara Outpost sha jingkieng Umshyrpi khnang ba kan long ka jing sngain ia ka iaid ka ieng jong ki paidbah bad kumjuh ruh ban pynneh ia ka jinglong trai jong ka Sorkar Jylla ia katei ka jaka.
Ha kawei pat ka bynta na ka liang jong ka FKJGP Upper Shillong Circle ka sngew ba tang ka jingrah ia ka Police Outpost kam pat bit dor satia hynrei dei ban pynkylla noh shi syndon wat ia ka kyrteng ruh na ka Jhalupara Police Outpost sha ka ‘Upper Shillong Police Outpost’ khnang ba ki trai ri trai muluk kin don ia ka mynsiem jong ka jing sngew shngain bad kham sngewjan ban ai ka jing iatreilang ha ki por baroh namar ba kum ka Seng hi ka sngew ba ka kyrteng Nongwei kam dei ban ioh jaka ha ka Bri U Hynniewtrep namar kane ka dei ka ia ba kum ka jaitbynriew hi ka thrang bad angnud ban ioh noh ia ka jingithuh ban pynrung ia ka ktien Khasi ha ka Khyrnit kaba Phra jong ka Riti Synshar ha ka Ri India namar ka Ing Dorbar Thaw Ain jong ka Jylla ruh dang shen kala dep pass ia ka Resolution ha kaba iadei bad kane ka bynta.