Shillong:Ka HYC Nongthymmai Circle mynta ka sngi ka la leit ban ia kynduh ia u CEM ka KHADC u bah H.S Shylla ban ia kren halor ka laisen bylla bad ka laisen khaïi ki bar jylla. Ia katei ka kynhun ka HYC la ialam da u bah Enlang Sawian President bad Daniel Syiem General Secretary. Ha kate ka jingiakynduh ka HYC ka la pynpaw ka jingsngewkhia halor ka jingioh laisen bylla lyngkar jong ki bar jylla bad kumjuh ki kompeni bapher kiba ioh laisen khaïi ban treikam.
Ka HYC ka la ai jingmut ia u CEM ban wanrah da ki polisi thymmai ban khanglad ia ka jingioh rung laitlan ki bar jylla kiba wan bylla ha kane ka jylla bad kawei na ki jingmut ba ka la ai ka long ban pyrkhing ia ki karkhana seng kam lane ki kompeni kiba seng kam ha kane ka jylla da kaba bsuh noh ia ka kyndon ba haba ki seng kam ha kane ka jylla ki dei ban pyntikna ba kin ai kam 80% ia ki trai jylla.
Kumba ka logn mynta ka HYC ka la ong ba ki kompeni ki ai kam ia ki bar jylla tang ha ki kam Grade IV lane ki kam sar ing ( Sweeper) ne ki nong kam ap ing ( Chowkidar) bad haba ia kren ia katei ki ju jubab ba ym shym don kyndon satia kaba kum kata ban ai jam bun ia ki trai jylla. Katei ka seng ka la kdew ba ka jingwan ki kompeni kam shym la pynmyntoi satia ia ki trai jylla naba kim ioh kam.