“Ngam ia khun lada ngam ioh tiket” ong u Bah Pynthymmai Chyne

Shillong,15 K’lyngkot:
Mynta ka sngi ka Congress ha Shella kam shym la lah ban pynbna ia u kyrtong jong ka, watla ka seng ka la pynlong ia ka jingialang jied kyrtong jong ka mynta ka sngi ha Saitsohpen,Sohra. Ki la don 2 ngut ki kyrtong kiba la pan tiket na katei ka seng , u Bah Pynthymmaibor Chyne bad u Bah Bantyngshain Rynga. Ka jingialang ka la rai ban phah ia baroh ar ngut ki kyrteng jong ki kyrtong sha ka District Election Comittee jong ka Congress ban shim ia ka rai iano ban ai tiket.
U Rupang ula ioh ban ia kren bad uwei na ki kyrtong kiba la aplai tiket u Bah Pynthymmaibor Chyne hato kum u kyrtong uba la iakhun teng ha ka elekshon MDC ba la dep u don ne-em ka jingkyrmen ban shah jied ha ka District Election Committee kum u kyrtong na Shella Konstitwensi, “Ka shong ha ka jingstad jong ka seng-ngam lah ban ong ia kata” ong u Bah Pynthymmaibor Chyne. Haba la kylli pat la un iakhun ne-em ha kane ka MDC 2014 lada jia ba u shah pynduh tiket “Ngan shong –ngan ym iakhun lada jia ba nga duh tiket” jubab biang u Bah Chyne. Katkum ka jingioh lum jingtip u Rupang, la ong ba u Bah Pynthymmai Chyne u dei uwei na ki kyrtong uba la ioh ka jingkyrshan napoh na u Bah Lestone Wanswett watla ym don eiei kaba paw shabar.
Lah ban pynkynmaw ba ha Shella ki la don ar ngut ki kyrtong kiba la iaknieh tiket na ka seng Congress ha ka elekshon MLA -2013, u Bah Lestone Wanswett bad u Bah Jropsing Nongkhlaw ha kaba ia ka tiket ka seng ka la aai sha u Bah Jropsing Nongkhlaw.Hynrei la iohi ba mynta ka kynti kitei ki ar ngut ki rangbah kiba la shah rem ha ka elekshon MLA kim shym la pan tiket na ka bynta ban ia khun MDC bad na ka liang u Bah Lestone kham mynshuwa haba ia kren bad u Rupang u la pynpaw ba un shongthait shuwa na ka MDC hynrei um pat lah pat ban ong ha ka MLA. Haduh mynta katkum ki jingtip ba la ioh lum ki don ar tylli ki Konstitwensi ka Shella bad ka Jaiaw kiba ka seng ka hap ban phah sha ka DEC ban rai ia u kyrtong jong ka.