“Lada u khot iakren, da ka kti ka mon, kawang da ka kti ka diang, ka shong ha u” Ngin kylli ia ki daw, balei ba kim lah pynlong ain ia ka ILP:Kharshanlor Baroh ki nongialam 13 Sengbhalang, kin leit iakren bad U Mukul

Shillong, 14 lyngkot:
“Baroh 13 seng, ngin ia leit lut” ong U bah GH Kharshanlor, nongia lam jong ka HNYF. “Ngim artatien” u ong biang. “Lada u khot iakren, da ka kti kamon, kawang da ka kti ka diang, ka shong ha u”. “Haba don jingiakren, dei ban leit. Khlem iakren, ym lah ban wan rah ia ka jing ia sngewthuh. Shu iakhih na rud, kam poi shano shano ruh” ong biang utei u nongialam jong ki Seng bhalang.
“Lashai ruh ka jingiakren, kan sdang da ka ILP” ong biang U Bah Kharshanlor. “U myntri rang bah, u ong em shi em”. Kaba la pynpaw, da U bah Khar shanlor, ka long ba ka sorkar ka dei ban sei lashai ka sngi, ia ki daw, kiba shai bad kiba shongnia bha, balei ba kim lah ban pyntreikam ai ka ain Inner Line Permit (ILP), ong U bah Kharshanlor. “Ban ong ba stad ma u ruh kam long, ban ong ba stad mangi ruh kam long, ban shu eh dohnud ruh kam long” ong biang u nongialam Sengbhalang.
Kaba U Bah Kharshan lor,u kren shai ka long ba lashai ka sngi, kin nym pdiang satia, lada u myntri rangbah, u wan rah biang ia ka ain shongwai. “Nga la peit lut ia ki ain shongwai ha baroh ka ri India, hynrei kam dei ban khang ia ka jingwan tuid ki bar Jylla” ula ong. “Ka ain shongwai te ngin nym pdiang. Wat ma u ruh, u ong ha ki kotkhubor ban pyntreikam shuh”.
U nongthoh khubor, ula kylli ia U bah Kharshanlor “Hadien lai bnai shiteng, ba kim ia kynduh shuh iwei ia iwei, la phi khmih lynti ne em, ba ka jingiakren, kan long kaba sngew paralok”. Halor katei la jubab u nongialam ka HNYF, da kaba ong “Khmih lynti ba kan long kaba ia sngew paralok. Lada bakla mangi ruh un pdiang, lada bakla ma u ruh ngin ia pyrkhat”. Kaba la ong biang da utei u nongialam, ka long ba mynshwa, u myntri rangbah, u long ehrang bad um ailad ban iakren jaitbynriew, hynrei hadien ka jingialang bah, kaba la long ha Madan Student, ha ka 30tarik Naiwieng 2013, u myntri rangbah, ula kham sngew iahap ban iakren jaitbynriew bad U bah Kharshanlor, ula ong “Lehse, u don ki jingstad, kiba u buhrieh shapoh, kiba ngi ngim tip” bad kumta, ka jingkhmih lynti jongki, ka long ba kin iakren da kaba shai bad kaba ia shaniah iwei ia iwei pat lashai ka sngi.
Ka jingialang, la sngewthuh ba kan long lashai ha ka por 11baje mynstep ha Secreteriat bad na kaei kaba la iathuh da u nongialam ka HNYF, la shim,ba ki nongialam jong ki 13 tylli ki Sengbhalang, kin ia poi lut ha katei ka jingiakren, lashai ka Sngi.