Ka UDP kam dei ban shu pynlut kai ia ka por: Mukul

Shillong, 14 K’lyngkot:
U Myntri Rangbah ka jylla, u Mukul Sangma u la ong ba ka UDP kam dei ban pynlutkai ia ka por.
Haba pynphai nia ia ka jingther ka UDP kaba byrngem ba kan leit ujor sha u Prime Minister, President halor ka jingkyn noh donkti jongu bad ki seng lehnoh, u Mukul u la ong, “nga la iohi ba ka UDP ka kwah ban leit iakynduh ia u president, prime minister bad kin ioh ia ka jingtip ba kham bniah. U Prime minister bad ka MHA (ministry of home affairs) kin don ka jingtip ba kham bha namar ba ki don la kajong ka atiar ban tip uno u politishian uba don jingiadei bad ki seng lehnoh”.
“Nga ai jingmut ia ka UDP ban nym pynlutkai ia ka por”, la ong u Mukul.
“U Dr Mukul u dei uwei napdeng khyndiat ngut ki politishian bym ju iajan ne iadei bad ki seng lehnoh. La tip ia kane da baroh, la tip da ki paidbah, la tip da ka sorkar India bad ka tnad Home Affairs (MHA),” la ong u Mukul.
Hynrei ha kawei ka liang, u Mukul um kdew eiei la yn thaw ia ka kynhun tohkit ne em halor ka jingkynnoh donkti jong ki politishian bad ki seng lehnoh ha kane ka jylla.
Ha kaba iadei bad ka GNLA, u Mukul u la ong ba ka sorkar ka iaid da ka lynti kaba ryntih khlem shah liang. U la ong ba ka jingiakren bad kano kano ka kynhun kan long hapoh ka kyndon jong ka riti synshar ka ri.
U la ong ba ka GNLA ka dei ban aiti shwa ia ki tiar ialehkai bad ban sangeh ki kam beain lada kwah sha ka jingiakren bad ka sorkar.