Jur iaknieh tiket, ym pat pynbna kyrtong ka Congress 3 na Jaiaw, 2 na Shella; ki nongiaknieh tiket

Shillong,14K’lyngkot:
Haduh mynta ka Congress kam pat lah ban pynbna lut ia ki kyrteng ki kyrtong jong ka ha kane ka lekshon MDC 2014,namar ba la jur palat ka jingiaknieh tiket. Ki la don katto katne ki Konstitwensi ba katei ka seng ka la dep pynbna kyrtong, kiba kynthup ia ka Mawsynram sha u Bah PN Syiem, na Nongshken sha u Bah Anthony Khongwang, na Lyngkyrdem sha u Bah Jansing Tynsong.
Haduh mynta ka Congress kam pat shym la pynbna kyrtong ha ki konstitwensi ba hap ha poh sor bad khapsor, na Jaiaw Konstitwensi ki la don haduh 3 ngut ki nongpan tiket na katei ka seng , ka kong H.Bareh, Bah P.Nongrum bad u bah N.Shullai, la ioh jingtip ba hakatei ka konstitwensi ka seng ka la phah ia kitei ki kyrtong sha ka District Election Committee. Ha Mawlai ruh haduh mynta ym pat ioh jingtip ia u kyrtong katei ka seng.Haba la pyrshang ban ia iakren bad u MLA barim ka Congress na Mawlai u Bah Founder strong Cajee u la ong ba mynta ym pat sngewthuh sngewthaw namarba u dang don hapoh Chennai.
Ha Shella Konstitwensi ki la don 2 ngut ki nongpan tiket u Bah Pynthymmaibor Chyne bad u Bah Bantyngshain Rynga, ha Sohra watla ym pat shym la ioh jingtip kaba thikna hynrei la ong ba ki la don 2 ngut ki nongpan tiket. Katkum ka jingioh lum khubor ha baroh kawei ka jylla la sngewthuh ba ka seng Congress mynta ka kynti kan pynmih da ki kyrtong thymmai ym kiba la don ha ka shuki MLA mynta.