250 ngut, ha ka prokram NIC ba 5 sngi ka NYK ha Shillong

Shillong,14K’lyngkot :
Ka Nehru Yuva Kendra ka la plie pyrda ia ka State Level National Integration Camp (NIC) ha Shillong ka ban sdang naduh ka 13 haduh 17 tarik mynta u bnai la pynlong ia katei ka prokram ha Bharat Scouts & Guide campus Shillong.
Ka jingthmu ba kongsan ba la pynlong ia kane ka camp ka long ban don ka jing ia sngewthuh jingmut hadeng ki nongshong shnong jong ki briew ha ki bynta ba pher bapher ha ka ri baroh kawei bad wanrah ruh ia ka jingia tylli bad ban weng ia ka jingia sngew pher jait bynriew ha ka ri baroh kawei.
 Haba ai jingkren ha ka jingialang u Sanjay Goyal,IAS bad Deputy Commissioner ka East Khasi Hills u ba long u kongsan ha kane ka sngi ula ong,ka jingthmu ba kongsan ba la pynlong ia kum kine ki prokram ka long ban rah ka khubor kaba bha sha ki paid nongshong shnong jong ka ri baroh kawei ba kum ki briew kiba im ha ka imlang sahlang ngi dei ban don ka mynsiem iai shah ha kane ka ri ka ba khleh kiba bun jait bynriew
“Ka imlang sahlang kam dei na ka bynta ka jingim ba shimet hynrei ka dei ruh na ka bynta jong ngi baroh,watla ha kane ka ri ngi don bun ki jait ki ktien ki niam ki rukom bad barabor ngi shem jingeh ha kaba ngi lah ban pyniadei khamtam ha ka ktien ka thyliej hynrei ngi dei ban long kiba iai shah ha kaba ngi lah ban wahrah ia ka jingsuk ka jingbha ha ka ri hi baroh kawei. Ka jingthmu ban pynlong ia kum kine ki prokram kan nym kut tang hangne hynrei ka iai bteng ha kaba ki nongtrei kam sngewbha kin nang iai bteng ia kane ka kam,to rah ia kane ka khubor ba kum ki nongshong shnong ngi dei ban don ka mynsiem iai shah na ka bynta ka jingbha ia baroh ha kane ka ri ba heh ba iar jong ngi” ong u DC.
Ki nong iashim bynta ha kane ka prokram ki don 250 ngut kynthup na baroh ki jylla jong ka ri  ki la wan ia shim bynta ha kane ka National Integration Camp (NIC) kiba kynthup ia ka Meghalaya, West Bengal, Bihar, Orrisa,Assam,Manipur,Tripura,Mizoram,Jharkhand badSikkim. Ha kine ki san sngi kin don bun ki prokram ka jingiakop shad bad rwai tynrai ki workshop ki seminar bad ka jingia phylliew jingmut hapdeng ki nong ia shim bynta khnang ba kan don ka jingia sngewthuh ia ka rukom im bad ka tynrai jong ki jait bynriew kiba im ha kane ka ri.