27 tarik yn ap ka JACATAM, ia ka jubab na ka sorkar

Shillong 12 K’lyngkot:
Hadien lai bnai ba la buh por, ka Joint Action Committee of All Teachers Association of Meghalaya (JACATAM) ha ka jingia lang ba la long hynne ka sngi ka la rai ban ai por ia ka sorkar ba kan ai ia ka jubab hapoh ha ka 27 tarik mynta u bnai.
Haba kren hadien ba la wai ka jingialang u Chairman ka JACATAM u Bah ED Nongsiang u la ong ba ka jingdawa jong ki na ka sorkar haduh mynta ka long ba ka sorkar ka dei ban shimti noh tang ia kam hikai (provincialise).
“Ngi dawa ba ka sorkar kadei ban shimti noh ia ka kam hikai bad ngin ai por ia ka sorkar ba kan ai ia ka jubab hapoh ka 27 tarik mynta u bnai”, la ong u Bah Nongsiang.
U Bah Nongsiang u la ong ba naduh ba iakynduh bad ka sorkar naduh ka 30 tarik u Nailur 2013 haduh mynta ka sorkar kam pat leh eiei halor ki mat jingdawa jong ki nonghikai.
La ong ba lada ka sorkar kam lah ban ai jingthoh ne ban ai ia ka jubab jong ki halor ka jingdawa ba ki la buh na ka liang jong ka JACATAM ki la rai ba kin shong jingialang biang ha ka 29 tarik mynta u bnai ba kin pynlong ia ki jingiakhih kiba tyngeh.
Lah ban kdew ba kham mynshwa ki nonghikai ki ladep ban pynlong ia ki jingiakhih bapher bapher ban pynbor ia ka sorkar ban pyntreikam noh ia ka jingdawa jong ki.