Nongstoiñ: Ka Shohphria Sport Club kala ioh ban pynhap pyrda noh ia ka lympung kynjatbol Inter Dong ia kaba la pyniaid da ka Shohphria SC bad ha katei ka sngi pynhap pyrda u MDC ka Nongstoiñ Konstitwensi u bah L.G Nongsiej u la long kum u kongsan ban pynhap pyrda.
Ki ar tylli ki kynhun kiba dang iashon dur lang bad u kongsan ha shwa ka jingiakhun phainal. (
Ia ka nam lahduh ha katei ka lympung ialehkai mynta u snem la ioh ban khur da ka Dong Khmahrati SC kaba la lah ban pynliem noh ia ka Dong Kohrai SC da 2 kol la 1 kol ha ka jingiakhun phainal kaba la long ha ka madan kynjatbol ka shnong Shohphria.
Na ka liang jong u MDC ha katei ka sngi u la ioh ruh ban noh synniang sha ka Shohphria SC haduh T. 5 lak tyngka na ka bynta ban shna pynbha ia katei ka madan ialehkai bad kumjuh u la ai mynsiem ruh ia ki samla jong katei ka shnong ba kin minot ban pyndonkam hok ia ka sap kaba la ai kyrpang da u Blei.
Shuh shuh u kongsan u la kyntu ruh ia ki samla katei ka shnong ba kin kiar na ki jingmlien kiba sniew lyngba ki jingdih kiba pynbuaid namar lada ki samla donsap ki ngop noh ha kitei ki jait jingdih kan sa pynhiar dor noh jingim ka jong ki.
Katba na ka liang jong u sordar katei ka shnong u ba long ruh u President katei ka sport club u la ai khublei kyrpang ia u tei u MDC u bala noh synniang haduh T. 5 Lak sha ka sport club ka jong bad u la ong ruh ba lyngba katei ka jingnoh synniang jong u MDC kala long ka jingkyrkhu kaba khraw ia ka sport club bad kumjuh ia ka shnong ka thaw hi baroh kawei.