Ha ki khyndiat sngi ba ladep, ha ka por ba ka don ka jingialang jong ka United Nations ha New York, U President jong ka Switzerland, U Alain Berset, ula shongthait pynjem met ialade ha ki madan phlang, ha phyllaw jong ka iing dorbar ka United Nations.
Ym tang katta, la iathuh ba ha ki sngi, ba u don ha katei ka jingleit dorbar ha New York, U Berset, u shet hi ia la ka jong ka bam, ha kawei ka kamra, kaba u ia sah lang bad ki nongtrei jongu; hynrei don kiba pynshai na ka ophis jongu, ba U Berset u sah ha kawei ka hotel.
U Berset, u dei U President ba la jied na ka kynhun ba hynniew ngut jong ki myntri ka Switzerland bad ha shwa jong kata, ula long u myntri kam poh iing jong ka sorkar ha katei ka Ri.