Shillong: Ka Shillong Lajong FC ka la pynliem noh ia ka MLP FT da shikol lanod ha ka lympung ialehkai Shillong Premier Legaue ka SSA myn hynnin ka sngi ha madan stadium SSA ha Polo.
Ha ka jingialehkai kaba mar ia ryngkat bor, ka Lajong ka la thep ia ka kol nam jop jong lyngba u Sheen S Sohktung ha ka 82 minit jong ka kylla miet ban pynliem ia ka MLP FT da 1-0.
Ka jingjop ka Lajong ka pynlong ba kan jam sha ka kyrdan ba-ar da kaba kamai 23 point na ki 11 sien iakhun katba ka MLP FT ka la hiar sha ka kyrdan ba san ba 11 point na ki 12 sien iakhun.
Ha ka jingialehkai 2nd Division ka Jongksha ka la pynliem ia ka Raitsamthiah da 4-1.
Ka nam jop jong ka Jongksha ka la wan lyngba ka hat trick u Joydeep Bamon uba la thep lai kol ha ka 51,60 bad 77 minit lyngba ha penalty bad u Skhemborlang Rynjah ula bynrap shikol ha ka 72 minit.
Ka Raitsamthiah ka la pynphai shikol da u Terrence Jyrwa ha ka 16 minit.
Ha ka jingialehkai 3rd Division ka Umphyrnai bad ka Lapalang ki la iakhaid da mar shi kol.
U Siemlahsem Gangte na ka Lapalang ula thep ha ka 29 minit katba ka Umphyrnai ka la pynphai kylla da u Jeffrey Kharumnuid lyngba ka penalty ha ka 40 minit ban pyniakhaid da 1-1 kol.