U Nitin Gadkari, myntri ka tnat shna surok jong ka sorkar India, ula kam ba ka seng BJP, ka la pynmih da ki kular ba lamler bad ki bym shisha, ha shwa ka elekshon 2014. Ha ka jingiakren ha ka prokram telebishon, kaba ha ka ktien Marathi, U Gadkari, u kam ba ka BJP, kam shym la mutdur satia, ba kan wan ha ka sorkar ha u snem 2014. “Ngim shym la mutdur satia, ba ngin wan ha ka sorkar ha u snem 2014 bad kumta ki briew jongngi, ki ai jingmut ba ngin buh da ki kular kiba jrong, namar ba lada ngim wan ha ka bor, ngim don jing kitkhlieh satia” ong U Gadkari.
“Mynta ki briew ki pynkynmaw ia ki kular jongngi bad ngi hap ban shu rkhie bad ban pynkhreh ia ka ban wan shakhmat” ula ong shuh shuh.
Katei ka jingkren U Gadkari, ka la pynsngew bang shibun eh ia U Rahul Gandhi, nongialam jong ka seng Congress, ha kaba U Rahul, ula phah kylleng ia katei ka video jong U Gadkari bad ka seng Congress, ka pynskhem ba ki jingkular elekshon 2014, ki dei kiba shu thok bad ki bym don jingshisha satia.