Shillong: Ka sorkar jylla ka la pynkut noh ia ka Megha Health Insurance Scheme Phase III bad shen kan sdang ban pyntreikam noh da kaba thymmai Phase IV ia kaba yn kynthup lang bad ka Ayushman Bharat , ka Pradhan Mantri Jan Arogya Yojana bad ka MHIS bad mynta ka sorkar ka dang pynkhreh ia kane bad yn sa pynbna paidbah shuwa ban pyntreikam ia ka. Ha katei ka skhim ba thymmai ki paidbah kin ioh jingmyntoi T.5 lak tyngka kawei ka longing.
U myntri ka tnad ka koit ka khiah u bah A.L Hek u la iathuh ba la pynsangeh ia ka MHIS naduh ka 25 tarik u nailur bad ia kito kiba rung hapoh Hospital shuwa ka por 11:59 baje mynmiet jong ka 25 kin dang ioh jingmyntoi haduh ba kin da mih.
U la iathuh ba ka Phase III ka la sdang naduh ka 1 tarik u jylliew 2017 bad ki don 4.4 lak tylli ki longing ba la pynrung kyrteng bad katei ka dei T.2,80,000 tyngka na ka bynta kawei ka longing. La pyntreikam ia ka Phase III haduh ka 30 tarik u jylliew 2018 bad ki don haduh 1.46 lak ngut kiba la ioh jingmyntoi bad ka pisa ba ka sorkar ka siew sha ki jaka sumar ba la iateh ka long T.94klur tyngka.