Ka ILP, kan dei ka mat ilekshon jong ka KHNAM:Adelbert “Iatylli tang ka MP, kam don jingmut, sdang na ka MDC”

Shillong, 10 ‘lyngkot:
Ka Khun Hynniew trep National Awakening Movement (KHNAM), ka la pynbna paidbah mynta ka sngi, ia U bah Process T Sawkmie, MLA barim jong ka Mawlai, ba un long hi u kandidet jong katei ka seng, ha kane ka elekshon MDC na Mawlai Constituency.
U bah Adelbert, uba dei U Working President jong ka Seng, u iathuh ha U Rupang, ba haduh mynta, ki don 7ngut ki kandidet, ba la pyllait paidbah da katei ka seng, kiba la pynkhreh ban iakhun ia ka elekshon MDC. La ong utei u nongialam ka KHNAM, “Ngim leit ban khroh ia ki kandidet, hynrei ki paidbah na ki Constituency, kin sei hi ia ki kyrtong” bad u iathuh ba ha ki sien ba ladep, haba ki iaid lait ia u paidbah bad ba ki buh kandidet, ki long pynban ki kandidet, ki bym lerkam satia.
La kren shai ruh da U bah Adelbert, ba ha kane ka elekshon, kaba mynta, ka mat Inner Line Permit (ILP), kan dei kawei na ki mat jingkular elekshon jong ka KHNAM. La ong da U bah Adelbert, ba wat la ka bor jong ka District Council, kam lah ban tuklar ia ka ILP, hynrei, u ong biang “Ngin pynkhih kum ki nongmihkhmat bad ka sorkar Jylla, ka dei ban sngap”.
U Bah Adelbert, u kren bynniaw ruh, halor ka jingmih jong ki katto katne ki seng trai ri, ban ia wer ban ia tylli kawei bad ban ialeh pyrshah ia ka Congress, ha ka elekshon MP, katba ha ka elekshon MDC, ki ia pharia la ka jong ka jong. Halor katei ka phang, U bah Adelbert, u ong “Ka dei ka jingshisha, ka jing ia tylli, ka dei ban sdang na ka MDC, lym kumta, ngin nym lah satia ban pyndep ia katei ka jingthmu”. [ngin sa pynmih biang ha ka Lah Sngi U Blei “Don ar jait ki seng Trai ri, ong U bah Adelbert].