Shillong: Ka Khasi Student’s Union Jaintia Hills District Unit ka la thoh sha u Deputy Commissioner ka East Jaintia Hills, Khliehriat ban pynpaw ka jingsngewkhia halor ka jingjaboh ka Wah Lukha na ka daw kajingleh khlem akor jong ki briew da kaba khlong mar pohkhyndew bad ka jingbret jaboh pathar na ki karkhana. Ha ki khyndiat snem mynta ka KSU ka la ong ba ka don ka jiingbret blei thaw ha Wah Lukha ha ka por Puja bad katei ka pynjaboh ia ka jingkhuid jingsngur jong katei ka Wah.
Ka KSU ka la ong ba ki por Puja ka ju mih ruh ka jingpynsawa kaba jam ha Wah Lukha bad katei ka pynthud ia ki sim ki doh kiba im kynjai ha ki khlaw ka Narpuh bad ka la ktah ruh ia ki briew kiba shong basah ha shi lynter katei ka wah bad ka pynthud khamtam ia ki nongkhwai dohkha. Ka KSU ka la ong ba kam don jingsngew pher niam satia hynrei ym dei pat ban leh khlem akor ia ka mariang. Ha katei ka jingthoh ka KSU ka la ai jingmut ia ka sorkar ba ka dei ban hukum ia ki Puja Committee bapher ba kin thaw noh da ka Pung ban bret blei ha ka por Puja namarba ki briew jong katei ka thaiñ kim kwah ban iohi ia ka Wah Lukha ba kan long kum ka Wahumkhrah lane ka Umshyrpi ha nongbah Shillong.
Kawei pat ka mat ba ka KSU ka la thoh sha u DC, ka dei halor ka jingkhrong pisa ka khyrdop khrong khajna kaba don ha Lumshnong na ki kali kiba dei na ka thaiñ Narpuh. Katei ka seng ka la ong ba kitei ki kali trai shnong ki iaid tang najan hajan, hynrei la khrong pisa ia ki bad kin hap ban siew man ba ki iaid lynti palat ia ka shisien ha ka shisngi. Ka la dawa na ka sorkar ba ka dei ban pyllait jingsiew ia ki kali jong ki trai muluk kiba kit jingkit najan hajan.