Nongpoh: Haba pynkut noh ia ka lympung ialehkai phutbol kaba la tip kum ka 1stInvitation Football Tournament, kaba la pynlong da ka CE Society ha Madan ialehkai Umdihar, ka Rongdop FC ka la ioh ban rah ia ka nam lahduh, hadien ba ka la lah ban pynliem noh ia ka Nartap FC da 5-4, ha ka jingiakhun phainal kaba la long ha ka sngi Saitjain ha Umdihar.
Ha kaba pynkut ia katei ka lympung phutbol, la sakhi da ka jingdon u Bah Donkupar Sumer MDC ka Umsning Constituency kum u kongsan, ha ryngkat ka jingdonlang u Tbn. S.S Lapang, u samla Aibor Lapang president ka CE Society Balang Umdihar lem bad kiwei kiwei ki riew rangbah jong katei ka thain.
Ka Rongdop FC, kaba la ioh ban rah ia ka nam lahduh, ka la ioh ban rah ia ka song pisa kaba long T.10,000, katba ka Nartap FC kaba la rem noh ha katei ka phainal ka la ioh ban khur ia ka song pisa kaba long T.5000.
Ha katei ka lympung ialehkai, na ka liang ki nongpyniaid jong katei ka lympung ialehkai, ki la sam ruh ia ki khusnam shimet ba kynthup ia ka nam Best Goaalkeeper ia kaba la ioh ban rah da u Secondpillar Sylliang na ka Umdihar CE Society, Best Player la rah da u Hollyjune Karo naka Rongdop FC bad ka nam Top Scorer la rah da u Lurmangkara Lyngdoh naka Mawjong.