Iasoh NPP u heh Congress

Shillong, 10 K’lyngkot:
U nongialam ba kham rangbah ka Congress u Chamberline B Marak u la pyniasoh ialade bad ki nongkyrshan sha ka National People’s Party (NPP) ha kane ka sngi Thohdieng.
U heh ka NPP u PA Sangma u la pdiang sngew bha ia une u nongialam ka Congress sha ka sem ka NPP ha ka jingialang hynne ka sngi. U Chamberline B Marak bad u Rakman Ch Marak ki dei at Bajengdoba ki dei ki nongialam ka Congress.
Haba kren ha kane ka jingialang pyniasoh sha ka NPP, u Chamberline Marak u la pynpaw ia ka jingsngew khia ia ka jinglong jingman ka suk ka sain ha Garo Hills bad ha ka jylla baroh kawei.
U la ong ba u PA Sangma kum u MP la 30 snem, bad kum u myntri sorkar pdeng bad myntri rangbah ka jylla u don ka jingsngewthuh kaba kham janai na ka bynta ka jylla.
Haba pdiang burom ia u CB Marak u PA Sangma u la kyrpad ia kiwei ki seng sain pyrthei ban wan ban iasoh bad ka NPP na ka bynta ban trei na ka bynta ka jylla.
Kiba don lang ha kane ka jingialang ki long u MLA barim ka Bajengdoba u Johnmanner Marak, Dr WR Kharlukhi, u MP barim ka Rajya Sabha u Thomas Sangma bad u TD Shira, u Conrad Sangma bad kiwei ki heh ka party.