Yn mih 2 ki Sing kynthei, ha ka elekshon MDC 2014

Shillong,9 K’lyngkot:
2 ngut ki longkmie kiba dang pyniasoh ialde sha ka Hills State People Democratic Party ( HSPDP) ka kong Grace Kharpuri bad ka kong Teilinia Thangkhiew ki dei kiba la thikna ba kin ia dur beit ha kane ka elekshon MDC 2014. Watla ym shym pat la ioh ban ia kren bad ki hynrei ka jingiasoh HSPDP jong ki ka dei ka dak kaba paw kum ka jingpynkhreh jong ki na ka bynta ka elekshon bad kumjuh ruh namarba kitei ki 2 ngut ki dei kiba dang don hapoh ka shuki MDC jong ki. Nalor ki 2 ngut kitei ki kynthei kiba dang shu pyniasoh shen bad ka HSPDP, lah ruh ban mih sa kawei pat ka kyrtong kaba la shah rem ha ka elekshon MLA ba la dep ka kong Fenela Nonglait. Lah ban kdew ba ha KHADC ki la don tang 3 ngut ki MDC kynthei ka kong Grace Kharpuri, kong Teilinia Thangkhiew bad ka kong Irene Hujon, 2 ngut na kitei ki la dei ki jong ka HSPDP katba ka kong Irene pat ka dang dei ka MDC Congress.
Kum ban shu pynkynmaw ba ha ka MDC elekshon ba la dep , ka kong Grace Kharpuri ka la jop na Nongshken Konstitwensi kum ka kyrtong shimet bad ka la pynliem ia ka kong Banalari Khongwar ka UDP. Ka kong Teilinia Thangkhiew ruh kumjuh ha ka elekshon MDC ba la dep ka la jop kum ka kyrtong shimet na Mylliem Konstitwensi. Kitei baroh 2 ngut ki MDC shimet mynta ki la rung sha ka party HSPDP ka seng kaba la don nongrim lypa ha KHADC bad kaba la don lypa 3 ngut ki MDC , kheinlang bad ki 2 ngut ka la poi sha ka 5 ngut.