Palat 3 bnai, sah umdum kiba shah pynpra iing ha Mawtari U MLA um ju wan mih shisien ruh ia ngi: KongTheirit Lyngdoh

Shillong, 08 K’lyngkot:
Ki briew kiba shah pynpra ia ki iing ki sem jong ki ha Mawlong Maw tari mynta la palat lai bnai ki la shu sah umdum namar haduh mynta ki sah khlem iing khlem sem, hadien ba la shah pynpra ia la ki iing jongki ha ka MUDA halor ka jingkynnoh ba ki shong beain ha katei ka jaka.
Haduh mynta 6 tylli ki iing kiba shah pynpra ha ka MUDA ki la hap ban shu shong iing basa katba ai lem ki para shnong bad don ruh napdeng jong ki kiba dang shna biang ia ki iing ki sem jong ki.
Ka Kong Theirit Lyngdoh ka la iathuh ba la jan palat lai bnai ba ki shah pynpra ia ki iing jong ki hynrei haduh mynta u MLA jong ki um shym pat wan mih shisien ruh naduh katei ka jingjia.
Ka la ong ba ha ka por elekshon ki wan khroh hi, ki wan pyrta tynghung ba kin iarap ia ki barit baria ki baduk basuk hynrei haba ia kynduh ia ki jingeh kim shym la wan mih satia.
“Mangi kiba duk ngim don pisa ba ngin leit mih ha ki MLA hynrei kadei ka kamram jong ki ba kin wan ban iarap lem ia ngi kiba duk lada ki don shisha ka jingiarap para briew”, la ong ka Kong Theirit.
Kane ka shnong Mawlong Mawtari ka hap ha ka Mawryngkneng Konstiwensi ha ka MLA bad ka hap ha Laitumkhrah ha ka MDC Konstiwensi.
Ka la ong ba shwa ban wan ka elekshon ki wan khroh wan kular ia ngi kibarit baria hynrei mynta ynda ki la ioh shong shuki ki la shu jah khlem wan mih haba iakynduh ia kum kine ki jingeh.
“Kumno ka sorkar ka beh ia ngi kiba shong ha ka jaka puta lajong katba ia ki dkhar kiba shong ha ki thain Polo bad Them motor kam shym la beh”, la byrap shuh shuh ka kong theirit.
Lah ban kdew ba Hynriew tylli ki iing kiba la shah pynpra ha ka MUDA kiba kynthup ka iing jong ka Kong Philemon Lyngdoh, Kong Bermon Lyngdoh, Kong Theirit Lyndoh,Boston Lyngdoh, Amton Lyndoh, Phron Kharkongor bad Precious Lyngdoh.
Na ka liang jong ka Kong Theirit ka la ong ba kin iakhun beit ia la ka jong ka hok namar ba ki don tang kane ka jaka bad lada duh noh ia ka jaka shaei kin shong phetwir.
Lah ban kdew ba ki trai jaka kiba shah pynpra ha ka MUDA ki la pynlong ia ki jingiakhih pyrshah ia ka jingwan pynpra iing ki MUDA ha sor Shillong ha ki bnai ba ladep hapoh ka jingiarap jong ka Kong Agnes Kharshiing bad ka Kong Angela Rangad.