“Ka ILP kam ktah ia ka Congress ha ka elekshon MP,MDC”

Shillong 8 K’lyngkot:
Ka Congress ka la kyrmen skhem ba ka jingiakhih Inner Line Permit (ILP) jong ki sengbhalang ha kane ka jylla, kan nym ktah eiei ia ka party ha ka elekshon MP bad MDC ban long shen ha kane ka jylla.
Ki 13 tylli ki sengbhalang ki la pynlong ia ka jing iakhih ha kane ka jylla ban dawa pyntreikam ia ka ILP kaba la iaid mynta la kumba lai bnai tam eiei na ka bynta ban tehlakam ia ka jingwan buhai shnong pathar ki briew ba nabar. Hynrei ha kawei ka liang, ki nongpeit pyrman ki la sngew ba kane jingiakhih ILP ha kane ka jylla, ka lah ban ktah ia ka Congress ha ka elekshon MP bad MDC.
Ka myntri ba peit ia ka tnad Social welfare bad kaba dei ruh ka Working President ka Meghalaya Pradesh Congress Committee (MPCC) ka Deborah Marak ka la ong ba ki party bym dei na ka Congress ki la pyrshang ban tynnruh dieng kot da ka ishu ILP pyrshah ia ka sorkar ba ialam da ka Congress hynrei kane kan nym ktah eiei bad ka kyrmen ba ki paidbah kin jied beit ia ka Congress. Ka la ong ba ka party kan ai ia ka jubab ia ki liangpyrshah halor kane ka ishu.
Ka Marak ka sngew skhem ba ka party Congress kan jop beit ha ka elekshon MP bad MDC ha kane ka jylla namar ba ka jylla ka la roi sted hapoh ka jingsynshar ka party.
Ka la ong ba ki nongtrei ka party kim dei ban shongkli hynrei ki dei ban trei tyngeh ban wanrah ia ka jingjop jong ka party ha kane ka elekshon ban sa wan.