Ym kyrkieh u Mukul, ban pyntreikam ia ka Food Security Bill

Shillong, 07 K’lyngkot:
Katba ka sorkar UPA ka dang thmu ba ka Food Security Bill kan long kum kawei na ki mat ialap ilekshon ha kane ka elekshon Lok Sabha, ka sorkar jylla pat kam pat kwah ban leh kyrkieh ia kane namar ba ka dang pynkhreh ba kan long kaba iaid beit khlem jingdkoh.
Haba kren mynta ka sngi, sha ki lad pathai khubor, u Myntri Rangbah u Mukul Sangma u la ong ba ka ka la don ka jingdkoh ha ka rukom pyntreikam ia ka Public Distribution System bad halor kane, ka sorkar ka kwah ba dei ban pynbeit bha shwa ban pyntreikam ia ka food security bill.
U la ong ba ka sorkar jylla kam pat kyrkieh ban pyntreikam ia kane ka ain khaw tad namar ba ka dang pynbeit ia ki jingdkoh bad khamtam ba ka dang pynkhreh ia ka khanasumari ka ioh ka kot ba dang pynkhreh ban pyndep mynta.
Ka sorkar ka la buh thong ban ai khaw tad haduh 75 percent ki nongshong shnong sha jaka nongkyndong bad 50 percent ha ki jaka sor.
Katkum ka jingkhein ka sorkar, kumba 21,94,000 ngut ki briew kin ioh khaw tad na ki 29,64,000 ngut kiba don ha kane ka jylla Meghalaya katkum ka khanasumari 2011.
U Mukul u la ong ba ki district kiba bun ha kane ka jylla kim pat don ia ka jaka buh marbam.