Kumba 30hajar ngut ki nongrep, ki la shah khang lynti mynta ka sngi, ban rung sha ka nongbah Delhi. Kitei ki dei ki nongrep kiba wan na Uttar Pradesh bad ki don jingthmu ban rah ha ka nongbah Delhi bad ban pynkut ia ka jingiaid pyrshah sorkar jongki ha Kisan Ghat, kaba dei ka jaka sah kynmaw ia U Chaudhary Charan Singh.
Ki nongrep kiba shah synreit um pad shah siat lyer sat khmat ha ki pulit ha khappud ka nongbah Delhi.
Ki pulit jong ka Uttar Pradesh, ki la pakhang lynti ia kitei ki nongrep bad haba ki nongrep, ki la sdang ban ia pyni bor, ki la pynpra ia ki, da kaba siat da ka um bad ka lyer sat khmat bad don na kitei ki nongrep kiba la mynsaw ha katei ka jingshah hiar thma ha kitei ki pulit.
Kitei ki nongrep, ki dawa ban map noh ia ka ram nongrep, ban ai duna dor ia ka bai ilektrik bad ka bai petrol bad ban ai bai bam tymmen ia ki nongrep kiba la palat 60snem bad ban pyntrei kam noh ruh ia ki jingai jingmut jong ka Swaminathan Commission.
Ka jingialang, ka sdang na Tikait Ghat ha Haridwar ha ka 23tarik Nailur bad ki nongrep kiba bun bah kiba Gonda, Basti bad Gorakhpur bad kynthup ruh ia ki bynta jong ka mihngi ka Uttar Pradesh, kiba dei ki jaka jong ki nongrep pai.
Ki nongialam jong ki nongrep, ki la ia kynduh mynta ka sngi, ia U Rajnath Singh, myntri kam poh iing bad la iathuh ba U Rajnath, ula mynjur ia kiba bun ki mat jingdawa jongki, ha kaba la sakhi lang da u myntri khynnah ka tnat rep jong ka sorkar India, U Gajendra Singh Shekhawat.
Ki nongialam jong ka Bharatiya Kisan Union (BKU), kiba ialam ia katei ka jing iakhih, ki kam ba kim pat poi satia sha ka jing ia mynjur bad ka sorkar India, na ka bynta ban pyntrei kam ia ka kaiphod jong ka Swaminathan bad ban buh ia ka dor die ia ki mar rep jong ki nongrep bad kumjuh ruh ban map beit shisien ia ka ram jong ki nongrep.
Na ka liang jong ki liang pyrshah sorkar, ki kynthah jur ia ka sorkar BJP, halor katei ka jingktah kti ia ki nongrep bad U Rahul Gandhi, uba dei u nongialam jong ka seng, ula ong ba ha ka sngi jong ka jingialeh pyrshah ia ki kam ia umsnam, hynrei ki nongrep ki shah bom, shah tied ha ki bor pulit.