Shillong:Ka senglongkmie ha Sohlap- Shella kaba la tip kum ka Sohlap Women Welfare Organisation (SWWO) ka la ioh ban kurup kyiad da ki spah bilor ha ka 21 tarik mynta u bnai na ki kali kamai kiba wan na Shillong sha Shella.
Katkum ka kyrwoh khubor na ka Secretary ka kong R.Natep bad President kong A Youroi ki la ong ba kitei ki kyiad ki dei kiba thmu ban die be-aiñ ha katei ka shnong. Ka kyrwoh khubor ka la ong ba na ka por sha ka por la maham ba ym bit ban die kyiad be-aiñ hapoh katei ka shnong naba ka pynjot ia ki khynnah samla kiba dang khie dang san bad ka pynjot ruh ia ka imlang sahlang hynrei ki dang don kiba leh pyrshah. Ia kitei ki kyiad ba la ioh kurup la theh bad bret noh ha madan ha ryngkat ka jingdonlang ka bor shnong.