Pynher shithi ka UDP sha ka PCF ban pyrkhat biang ia ka rai

Shillong, 06 K’lyngkot:
Ka UDP ka la pyn her shithi sha ka People’s Candidate Forum (PCF) ba kan pyrkhat biang ia ka rai ban pynieng ia u kyrtong jongka u Pastor PBM Basaiawmoit na ka bynta ka elekshon MP ban wan. Ka UDP ka kyrpad ba ka PCF ka dei ban kyrshan ia u kyrtong ka UDP u Bah Paul Lyngdoh na ka bynta ka Shillong Lok Sabha constituency.
Kham mynshwa ka PCF ka la rai ban pynieng ia u Pastor Basaiawmoit katba ka UDP ka la thmu ban pynieng ia u Bah Paul Lyngdoh.
Ha ka shithi sha u chairman ka PCF, secretary ka UDP campaign committee u Bah Allan F Dkhar u la ong ha kane ka sngi Nyngkong, ba la kyrpad ia ka PCF ba kan pyrkhat biang ia ka rai jongka. “Ngi long ba la khreh ban iakren pynbeit bad ka PCF” la ong u Bah Dkhar.
Ka UDP ka la khroh ia ka jingkyrshan jong kiwei ki pary bym dei Congress kum ka National People’s Party (NPP), Bhartiya Janata Party (BJP), Khun Hynniewtrep National Awakening Movement (KHNAM) na ka bynta u kyrtong jongka. Hynrei ka PCF ka kyntait.
U Bah Dkhar u la ong ba ka UDP ka la pyrshang ban wanrah ia baroh ki party ha kawei ka kynhun ban iakhun pyrshah ia ka Congress ha kane ka elekshon ban wan.
Halor ka jingpynmih ia ka kyrteng ban pynieng ia u Bah Paul, u Bah Dkhar u la ong ba ka party kam pat pynbna hynrei ka dang shu pynpaw ia ka kyrteng.
U Bah Dkhar u la ong ba ka Steering Committee kan shong shwa ban pynbna ia u kyrtong.
Haduh mynta, PCF ka ioh ia ka jingkyrshan tang na ka Hill State People Democratic Party (HSPDP).