Shillong:Ki nongtrei jong ka kotkhubor Press Trust of India kiba don hapoh ka lama jong ka Federation of PTI Employees Union kin ia khih lashai ka sngi ka 1 tarik u risaw namar ka jingweng kam katei ka kotkhubor haduh 297 ngut ki nongtrei jong ka kiba don ha kylleng ka ri India. Ki la thoh sha u CEO jong ka PTI ba un weng noh ia ka rai jong katei ka kotkhubor bad kum ka dak ka jingpyrshah kin ia khih da kaba shong kyllaiñ mongor ha baroh ki jaka treikam ka PTI ha ri India. La soi ia katei ka jingthoh da u General Secretary jong katei ka Union u Balram Ringh Dahiya.
Ha ka 29 tarik mynta u bnai u Chief Administrative jong ka PTI u M.R Mishra u la pynmih ia ka hukum ba la weng kam ia ki nongtrei jong katei ka kotkhubor da ka jingmut ban pynduna noh ia ki nongtrei bad la phah ia ka shithi ba la weng kam sha baroh kiba shah weng bad la phah ruh ia ka pisa kaba dei ban siew sha ki Account jong ki.