Rakhe Kristmas, da ka iatim sih bad kren shait kynthei?

Shillong, 5 ‘lyngkot:
Ka jingrakhe ia ka Kristmas bad ka Snem thymmai, wat la ka long kaba kmen ia kiba bun, hynrei, ka dei ruh ka jingrakhe kaba thad ia ka longbriew man briew jong kiba bun ki samla Khasi jongngi, ha kiba kum kine ki sngi.
Ha ka surok bah Upper Shillong, ha kiba kum kine ki sngi, la ju ioh sngew ia ki kali kiba tem da ki jingtem kiba pyn sawa jur bha bad napoh kitei ki kali, la ju ioh sngew ia ki khynnah samla, kiba ia kyrkait bad ia tim sih tim sang, haduh ba ka la long kaba sngew jli haduh katta katta ban ioh sngew.
Ym dei tang katta, ha ka step jong ka 30tarik Nohprah 2013, haba une u nongthoh khubor bad kiba ha iing, ki dang ia ieng kai ha surok surok jong ka Shnong Sohra, la wan poi kawei ka taksi, kaba la thiah lyngkrang da ki khyn nah buaid bad tang shu mar ia iohi kynthei, ki la ia pyrta “ei shik” bad kitei ki dei hi ki khynnah samla Khasi.
Ym tang katta, la iathuh ba dang shen, ha ka jingrakhe khristmas, ki la don shi kynhun ki samla Khasi, kiba leit shangkai sha Wah Umngot, ha Dawki, hynrei ki sah kut noh ha thanat ki pulit ha Dawki bad ka daw, ka long ba ki leit pynkulmar ha ka jaka ia shongkai pyngngad uba bun balang.
Uwei u rangbah, haba iakren ha ka khmat ka Krem Pubon ha Mawsmai, ula kynthoh “Kiba kham leh tam, ki dei hi ki khynnah Khasi” bad ula ong shuh shuh “Hangne, phi lah ban iohi lut, ia ka jinglong jong ki briew, ia ki Khasi, ia ki dkhar bad ia kaei ka dur kaba shisha jong ki nongleit shangkai sngewbha”.
Haba iakren ia kane ka phang bad U Rangbah Shnong ka Dawki, U bah MF Ryngksai, ula kynthoh, da kaba ong “Kiei kiei ki sdang na la iing bad kiei kiei, ki kdew ha kine ki sngi, ba ka la synjor ka jinglong jingman na la iing”.
Kiba kum kine ki jingjia jong ki jingkhlem akor jong ki khynnah samla Khasi, ki long kiba la kren diaw mynsiem lut, da kiba bun bad uwei na ki nonghikai, ula ong “Ha ka 1tarik, ngi ia bam khana ha pung Umiam, hynrei hap ban ia wan noh dang shai, namar ba ki khynnah samla shynrang kynthei, ki la ia shlur pat bad leh ia ki kam jaboh ha khmat uba bun balang ha ki rud um jong ka pung Umiam”.
Katei ka jingujor ia ka jing tla sih jong ki khynnah samla Khasi, ka jingbuaid tanglang jong ki samla kynthei bad shynrang ruh kumjuh, ka dei kaba la iai ujor sha u nongthoh khubor man ka por, ha ki jaka shang kai pyngngad jong ka Sohra, Umiam bad kumjuh ha ki lad ba ki leit ki wan kine ki kali jong ki nong bam khana.