Shillong: Ka Ri-Bhoi napdeng ki shynrang bad ki thei ka East Khasi Hills ki la rah ia ka nam laduh ha ka lympung ialehkai ka State Level Mission Football Meghalaya Open Tournament 2018.
Ka Ri-Bhoi ka la pynliem ia ka West Jaintia Hills da 1-0 kol ba la thep da u Sparkle Khongsiej katba ki thei ka East Khasi Hills ka la pynliem ia ka West Khasi Hills da 1-0 kol ba la thep da ka Nisilia Majaw.
Ha ka jingialehkai jong kiba hapoh 15 snem ki shynrang, ka East Khasi Hills ka la pynliem ia ka East Jaintia Hills da 2-0 kol bad ia kine ki kol la thep da u Emboklang Nongkhlaw baroh ar kol.
Ha ka jingiakhun jong ki kynthei pat, ka East Khasi Hills ka la pynliem ia ka West Jaintia Hills da 4-1 kol. Ia ka East Khasi Hills la thep da ka Fedelia Lamare 2 kol, bynrap da ka Sanfida Nongrum bad ka Fragrancy Riwan mar kawei. Kawei ka kol ia ka West Jaintia la thep da ka Aetisha Lytan.
Na ki shynrang, ia ka nam best goalkeeper la ioh da u Deranius Wahlang na Bhoi, katba na kynthei la ioh da ka Ibakordor Hujoh na West Jaintia ha ka U-18 katba ha ka U-15 ki shynrang la ioh da u Luckystar Lawai na East Khasi Hills bad na ki kynthei la ioh da ka Deimima D Syiem na East Khasi Hills.
Kiba thep bun kol ha ka U-18 shynrang ki long u Iaisynroplang Lyngkhoi na West Khasi, na ka kynthei la ioh da Nisilia Majaw na East Khasi. Ha ka U-15 ki shynrang, la ioh da u Batskhem Jyrwa na East Khasi Hills katba na ka kynthei la ioh da ka Fedilia Lamare na East Khasi Hills.
Kiba ioh best player ha ka U-18 ki shynrang ki long Sparkle Khonshai na Ri-Bhoi, katba na kynthei la ioh da ka Marbalin Nongrum na East Khasi Hills.
Ha ka U-15 shynrang, la ioh best player da u Gladdy N Kharbuli na East Khasi Hills katba na kynthei la ioh da ka Sanfida Nongrum na East Khasi Hills.