Ai khublei pulit ki taksi

Shillong, 3 K’lyngkot:
Ka Shillong Region Taxi Owners and Drivers Association (SRTODA) ka ai jingiaroh ia ki pulit ka Shillong kiba la lah ban pynllait ia ka jingsahkut kali ha Nongbah Shillong khamtam ha ki sngi Kristmas bad New Year.
Ha ka kyrwoh ba la pyllait da u General Secretary u Bah James S Malngiang la ong ba ka seng ka la ia khublei ia ki pulit ka jylla kiba la trei shitom ban pynsuk ia ka leit ka wan jong u paidbah ba bun balang.
Kumta na ka liang ka seng kala kyrpad ia baroh ki nongniah kali khamtam ki taksi ba kin nym pynieng kulmar ia ki kali jong ki haba kyntiew ne pynhiar ia ki nongshong kali khnang ba kan nym pynthut ia kiwei pat kiba bud nadien jong ki.
Shuh shuh ka seng ka la kyntu ia baroh ki trai bad ki nongniah taksi ba kin long kiba adkar ban nym iasih sngewbha ne ban leh kino kino ki kam beain ha ki kali.