Shillong: U President ka Seng Khasi Kmie, Shillong bah Don Dkhar mynnin ka sngi u la plie ia ka Aiom Lehkmen Seng Kut Snem 2018 ba la pyniaid da ka Seng Samla Seng Khasi Kmie, Mawkhar Shillong.
U Rgh Don u la buh ia ki kyntien kyrkhu kyrdoh ia ka Seng Samla Seng Khasi Kmie ka ba shimti ia katei ka kam na bynta ban dang kiew rasong ym tang ha kaba iadei bad kane ka kam hynrei ha baroh ki liang kiba kum ka Seng Khasi kaba ju shakri na bynta ka Ri bad ka Jaidbynriew lyngba ka jingngeit ha la kajong ka Niam ka Rukom.
Ym tang katta u President u la pynpaw ruh ia ki kyntien ha kaba iadei bad ki khun samla jong ka seng Khasi ban long kiba la pynkhreh na bynta ban ker ban da bad ruh ban pyllait ia ki sai khum sai teh kiba jyrwit jyrwat ha kum kane kapor kaba ka Jaidbynriew ka donkam palat da kaba iatreilang bad ka Seng Kmie bad ruh ialam ia ki Seng Samla jong ki tnat seng khasi bapher bapher ba hashwa ba kin shim ia kino kino ki sien jam kiban kam shakhmat la ka long ha kaba iadei bad ka sorkar ne kiwei ki kam ruh kumjuh.
Ki tnat seng khasi ki donkam ruh ban pyntip sha ka seng kmie hashwa ban iaid shakhmat namar ba dei tang ka seng kmie kaba aibor bad kaba hap ban shim ia ki jingkitkhlieh baroh bad lada kanpoi kapor ba ki hap ban iaid lait ne wat ban shim ia ka rai tang halade la kalong kino2 ki tnat seng ne ki tnat treikam bapher2 kata kamut ka seng kmie kan ymdon jingkitkhlieh eiei ruh em.
Hashuwa ban shong u President u la pynbna iar ba ka Aiom Lehkmen mynta ka sngi la plie pyrda da ka jingkyrkhu kyrdoh kaba khuid ba sngur hapdeng baroh ki nongpyniaid lem bad ia ki nongiashim bynta ruh kumjuh.
Ki nongjop ha ki jingialehkai mynne ka sngi ki long, ha ka Siat khnam kynhun ba hapoh 14 snem, Nongjop ba nyngkong Seng khasi Laitkor, nongjop ba ar seng Khasi Laitryngew. Ha ka Siatkhnam para marwei hapoh 14 snem, Nongjop seng Khasi Laitryngew, Nongjop ba ar seng khasi Laitkor, ha ka Iasiat kynhun hapoh 18 snem, Nongjop seng khasi Wahsohlait, Nong ba ar seng khasi Laitkor, ha ka iasiat para marwei hapoh 18 snem, Nongjop seng khasi Laitkor, Nongjop ba ar seng khasi Mawkasaiñ.
Ki don ruh ki jingialehkai jong ki khyllung kiba la wan iashim bynta napoh ki tnat seng khasi bapher bapher.